A pustis de bìndighi annos de ausèntzia, su grandu tziclismu de professionista, in fines, torrat a Sardigna. Oe, in s’Assessoradu regionale de su Turismu, ant presentadu difatis su programa de su Giru de sa Sardigna, un’eventu de livellu internatzionale chi at a pònnere s’Ìsula a su tzentru de s’iscena isportiva mundiale.
Sa cursa si curret dae su 25 de freàrgiu a su 1 de martzu 2026, cun partèntzia dae Casteddu Sardu e lòmpida a Terranoa, pro unu totale de 830 chilòmetros partzidos in chimbe tapas: unu percursu chi at a tocare unos cantos logos tra is prus ammajadores e ispantosos de sa Sardigna. A sa gara partètzipant 25 iscuadras, medas de custas ant seberadu s’Ìsula fintzas pro is deghe dies de preparatzione in antis de su cumintzu de sa cumpetitzione. 175 is tziclistas, acostagiados dae ateretantas iscuadras tècnicas. In totu, su Giru interessat 550 persones, cun una màchina organizzativa manna a beru cun una caravana de 120 veturas, 25 postales, 28 autocarrus, 22 furgones, 40 motos e un’elicòteru.
Manna fintzas sa visibilidade mediàtica de s’eventu: cada tapa dd’ant a trasmìtere in direta un’ora e mesu in Rai 2, cun imàgines difùndidas fintzas a traessu de canales televisivos e prataformas web de is chimbe continentes. De contu sa presèntzia de s’istampa natzionale e internatzionale puru, a cunfirmare s’importu de sa manifestatzione.
A sa cunferèntzia de presentada ant partetzipadu sa Presidente de sa Regione Sardigna, Alessandra Todde, chi at bòlidu cun fortza sa torrada de su Giru, s’Assessora regionale a s’Isport, Ilaria Portas, su Presidente de sa Lega de su Tziclismu Professionìsticu, on. Roberto Pella, su Presidente regionale de su CONI, Bruno Perra, su Presidente de sa Federatzione Tziclìstica Italiana in Sardigna, Stefano Dessì, e su Cumandante de sa Politzia Istradale, Domenico Chierico.
Ddoe fiant fintzas bator campiones de su tziclismu italianu, seberados comente Ambasciadores de s’eventu e chi ant a animare is chimbe tapas: Fabio Aru e Claudio Chiappucci, cun Francesco Moser e Gianni Bugno collegados dae remotu.
Sa manifestatzione no est un’addòbiu isportivu ebbia, ma un’oportunidade istraordinària de promotzione turìstica e econòmica. Difatis s’eventu s’acumprit in unu perìodu de istajone bàscia, s’eventu punnat fintzas allonghiare s’istajone turìstica a a avalorare is biddas, is sitos reconnotos dae s’UNESCO e is primores produtivos de s’Ìsula, promovende unu modellu de isvilupu acapiadu as’isport.
Su Giru de Sardigna rapresentat unu de sos capìtulos prus importantes de su tziclismu italianu. Nàschida in su 1958, a pustis de is primas esperièntzias de professionìstica in s’ìsula giai a urtimada de is annos Baranta, sa cursa si fiat afirmada a sa lestra comente addòbiu internatzionale de cumintzu istajone, faghende acudire is mègius iscuadras e campiones mannos. In s’albu de oro, difatis, podimus fantomare fa Eddy Merckx, Jacques Anquetil, Vittorio Adorni, Marino Basso, Giuseppe Saronni e Peter Sagan, a cunfirma de su valore isportivu e simbòlicu de sa manifestatzione.
Foto ciclismoweb
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
