“Custa istade, in sas duas chidas de vacàntzia, so torradu a lèghere duos libros de Grazia Deledda: ‘Il vecchio della montagna’ e ‘Canne al vento’. Ddos aia lèghidos cando fiat giòvanu – medas annos a oe – però apo agatadu su matessi sentidu, sa pròpriu impressione de tando, agatende cunfirma de sa modernidade de s’òpera de Grazia Deledda”.
Dd’at naradu oe in su teatru Eliseo de Nùgoro su presidente de sa Repùblica, Sergio Mattarella, in ocasione de su tzentenàriu de su prèmiu nobel pro sa literadura retzidu dae Grazia Deledda, prima e ùnica fèmina italiana a otènnere custu reconnoschimentu.
(foto de Francesco Ammendola – Ufìtziu pro s’imprenta e sa Comunicatzione de sa Presidèntzia de sa Repùblica)
At abertu s’eventu s’esecutzione de s’Innu natzionale sighida dae su saludu de su sìndigu de Nùgoro, Emiliano Fenu, e de sa presidente de sa Regione Sardigna, Alessandra Todde. Sunt intervènnidos finas s’iscritore Marcello Fois, sa presidente de s’assòtziu internatzionale crìticos literàrios, Neria De Giovanni, Dino Manca professore assotziadu de filologia de sa literadura italiana in s’Universidade de Tàtari e Stefania Lucamante, professora assotziada de Literadura italiana cuntemporànea de s’Universidade de Casteddu. Intre un’interventu e s’àteru s’esecutzione de “Non potho reposare” a banda de sos istudiantes de su Litzeu Musicale de Nùgoro.
“Prima de torrare a su continente, comente naramus nois isulanos – at sighidu a nàrrere Mattarella-, non podia no espressare cun grandu cumbitzione istima pro cantu donant custa tzitade e custa Regione a s’Itàlia”.
“Est unu momentu de importu in sa vida de su mundu – at concruidu -, non semper craru, non semper ordinadu, ma su contributu chi sas regiones nostras, in manera signada custa Regione, frunint a sa vida natzionale est unu contributu indispensàbile pro parare fronte a totu sos problemas chi ddoe sunt”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
