Bìsitas ghiadas e a indonu acumpangiados dae is istudiantes pro iscobèrrere su patrimòniu culturale e ambientale de sa Sardigna. Sabadu 22 e domìniga 23 martzu, torrant in Itàlia e Sardigna etotu is dies “Fai di Primavera”, eventu dedicadu a su patrimòniu culturale e paisagìsticu italianu, promòvidu dae su Fundu pro s’ambiente italianu (Fai).
Ocannu sa manifestatzione arribbat a sa de trinta e tres editziones e festat chimbanta annos dae sa nàschida de su Fai. In s’Ìsula aberint ùndighi logos gràtzias a s’aficu voluntàriu de istudiantes e universitàrios chi ant a ghiare is bìsitas.
In Assèmini aberint su situ de Saline Conti Vecchi, in Casteddu sa caserma Attilio Mereu, in Busache s’abertura pertocat sa Diga Eleonora, isbarramentu de su riu Tirsu chi at criadu su Lagu Omodeo. In Tàtari aberit su Palatzu de sa Provìntzia, progetadu e fraigadu intre su 1873 e su 1877 e sa Frumenteria, in S’Alighera sa biblioteca de su Mediterràneu e s’archìviu istòricu.
In Tèmpiu su Palatzu Sanguineti, mentras in Figari sunt abertos su “Pozzo sacro” Miris e s’istatzione ferruviària. In Nùgoro bìsitas in su cunventu de clausura “Mater Salvatoris”. In Palau aberta sa “Batteria Talmone” de Punta Don Diego.
“Est un’editzione ispetziale – at naradu Monica Scanu, presidente Fai Sardigna – chi festamus cun ùndighi logos visitàbiles. Semus fintzas cuntentos de is collaboratziones de importu cun sa Regione Sardigna e cun medas comunos sardos”.
In prus sa Regione Sardigna aderit cun s’abertura a su pùblicu de Villa Pozzo, giai Villa Caria, in Tàtari, fàbbricu in istile liberty fatu in su 1927 pro sa voluntade de Francesco Caria, imprendidore de su late in sos annos ’20, chi cun sos frades suos, est istadu tra is primos a bèndere su casu sardu in su mercadu de is Istados Unidos.
Sa bìsita in sa Villa, como de propiedade de sa Regione, at a èssere arrichida dae su contributu de istudiosos e espertos e dae is istudiantes de su Cunservatòriu.
“Prus in antis – narat s’assesore de s’ Urbanìstica, Francesco Spanedda – contamus de la restaurare, fintzas gràtzias a un’istantziamentu dedicadu a is edifìtzios de rapresentàntzia de sa Regione Sardigna cun 9 milliones de èuros chi cumprendet siat Villa Pozzo chi Villa Devoto in Casteddu”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
