In sa bidda de Siddi a pustis de tres annos torrat su fèstival ‘Appetitosamente’ dedicadu a su papare. Su 30 e su 31 de argiolas ant a èssere dies de atòbios cun espertos de su setore alimentare, laboratòrios ma fintzas de arte e mùsica.
Lòmpidu a sa de deghe-chimbe editzione, a su fèstival s’at a faeddare de duos problemas chi interessant totu su mundu: sa crisi chi cunsighit sa gherra in Ucràina cun s’aumentu de su prètziu de su trigu e de sas àteras matèrias, su mudamentu de su clima.
Sunt temas custos chi pertocant finas sas biddas prus piticas de sa Sardigna da ue però diant pòdere arribbare solutziones. E di fatis su fèstival organizadu dae su Comunu de Siddi in paris cun su comitadu Appetitosamente 2021, sa Pro loco, sa cooperativa Villa Silli, assòtzios e voluntàrios bolet ammustrare a sos bisitadores totu su chi territòriu podet ofèrrere a cumentzare pròpiu dae sa cosa de papare.
Tando su programma previdet puru atòbios cun espertos, produtores locales, laboratòrios de coghina, mercados a tema e chenas. Appetitosamente però at a èssere puru una festa: sàbadu 30 a sas sete de su sero a Sa domu ‘e s’Orcu at a sonare su pianista e cantautore Raphael Gualazzi. Sa die a pustis in su matessi logu b’at a èssere su cuntzertu a s’arbeschidòrgiu de Elisabetta Steri (pianoforte) e Andrea Ortu (Flauto)
Tra sos atòbios de su sàbadu su laboratòriu ‘il riso fa buon sangue’ cun Carlo Ferrari de s’azienda iFerrari de Crabas e Fabio Maggio de tzentru de chirca Crs4. Sa die in fatu de sutaliniare su dibatu ‘Ricette per il futuro’ in paris cun su chef Davide Atzeni, s’antropologa Alessandra Guigoni e s’archeòloga Maria Antonietta Mongiu. S’at a chistionare finas de mudamentos climàticos gràtzias a sa partetzipazione de su giornalista e climatologu Luca Mercalli e Flavia Marzano presidente de su comitadu tècniu iscientìficu de sa Fondatzione Ampioraggio.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
