Su tribunale eclesiàsticu interdiotzesanu de sa Sardigna at cundennadu unu predi, don Valerio Manca de sa sede de Tèmpiu-Ampurias, pro abusos sessuales commìttidos in is annos Otanta contra unu pitzocu de 14 annos chi frecuentaiat su Collègiu seràficu frantziscanu de Aristanis.
Cuddu giòvanu, crèschidu, chimbe annos a oe at tentu su coràgiu de denuntziare sa violèntzia a pustis de aere addobbiadu su predi posca meda annos. Pro Paolo Contini, oe pàrrocu de is comunidades de Abbasanta, Ilàrtzi e Norghiddo, est istadu unu percursu difìtzile meda: “Oe est una die de importu, ant reconnotu is denùtzias chi apo fatu e is abusos subìdos, Valerio Manca no est prus unu predi de sa Crèsia catòlica – at naradu in Facebook -. Apo fatu custu passu pruschetotu pro amparare àteros pitzocos chi diant podere subire sa matessi cosa chi apo sufridu deo. Ddu depia fàghere, chimbe annos de luta pro otènnere beridade”.
Su chi est acontessidu a don Paolo Contini de seguru no est un’episòdiu ùnicu in Sardigna. Eris sa garante regionale pro s’infàntzia Carla Puligheddu at imbiadu una lìtera a s’artzipìscamu de Casteddu Giuseppe Baturi, chi est finas su segretàriu generale de sa Cei (Conferèntzia episcopale italiana), pedinde controllos prus pretzisos pro amparare is minores.
In sa lìtera Puligheddu sutalìniat is ùrtimos datos de s ”Osservatòriu Permanente de sa Rete S’Abusu”. Dae su 2020 a su 2025 in Sardigna ant tzensidos 37 casos de abusos: 11 in Casteddu, su matessi nùmeru in Tàtari, 8 in Aristanis e 7 in Nùgoro. In generale 196 is vìtimas subravìvidas, de custas 171 fiant minores candu ant subìdu s’abusu.
“In Sardigna – iscriet Puligheddu – sa majoria de is casos non benit denuntziada contribuende a lassare impunidu chie faghet custu reatu chi est galu prus grae in cantu perpetradu dae pessones, mannos, chi diant dèpere èssere prus de fide”.
S’ispera pro sa garante est un’atu de coràgiu evangèlicu e tzivile pro collaborare cun sa magistradura: “Su tempus de su mudìmene est finidu, depet cumintzare su de s’amparu de is minores”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
