Israele est cada die in sos giornales pro more de su chi est faghende in Gaza e in Tzisgiordània. Como fintzas pro sos bombardamentos in Iran. Ma sa nova chi pertocat sa Sardigna est chi b’at unu bolu diretu dae Tel Aviv a Terranoa.
«Bolos charter prenotados in privadu», comente narant is de s’assòtziu de amistade Sardegna Palestina, «chi ant a batire paritzos israelianos ricos disigiosos de si rilassare in s’ìsula nostra pro totu sos meses de làmpadas e trìulas».
In su matessi tempus «unu protocollu de seguresa afortida at a permìtere a politzia e agentes de seguresa israelianos in burghesu de traballare in Terranoa compidende bagàllios e porroghende in passigeris in partèntzia dae Sardigna».
S’assòtziu puntat su pòddighe: «Cando chi in Tzisgiordània sunt atzellerende·bi·la cun s’annessione violenta de terras palestinesas a sos insediamentos de is colonos, si bombardant paisos soberanos in sa prus totale impunidade e in Gaza sunt acumprende a unu genotzìdiu, grupos festajolos de tzitadinas e tzitadinos de custu istadu criminale movent sulenos in vacàntzia peri su mundu. Ma non fiant in gherra? Como lompent a Sardigna, terra dae semper bèndida o allogada a su mègius oferente e a sos peus criminales de gherra, bastis chi paghent bene».
Contra a custas vacàntzias ant programmadu un’apuntamentu in Terranoa mèrcuris su 18 a oras de sas 9 in s’àrea de sos arrivos de s’aeroportu Olbia Costa Smeralda. Is organizadores – chi ant postu sos nùmeros issoro in locandina pro sas adesiones – ant dadu custos inditos: «giughe·ti in fatu banderas palestinesas, keffiyah, banderas de sa Sardigna ma perunu sìmbulu de partidu o de sindacadu, custa est una batalla de totu cantos».
E la serrant narende chi «su tempus de sas cundennas verbales est finidu, como est ora de atziones cuncretas, immediadas».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
