Est prevìdida sàbadu 19 e domìniga 20 de ladàmini, in Mòguru, sa de batordighi editziones de su BìFoto Fest, fèstival internatzionale de fotografia chi ocannu tenet comente tema de riferimentu su branu Society, de su mùsicu e cantautore istadunidensu Eddie Vedder.
Ant a èssere duas dies ricas de eventos, mustras e presentadas de libros chi ant a tènnere comente tema una riflessione subra de sa sotziedade nostra.
Su fèstival cumintzat sabadu a sas 16:30 in piazza Giovanni XXIII, cun sos saludos istitutzionales, sighit una bìsita a sas 8 mustras fotogràficas in su tzentru istòricu de Mòguru acanta b’ant a èssere sos progetos binchidores de su Prèmiu BìFoto e su traballu de su fotògrafu danesu Søren Solkær, realizadu in parte fintzas in Sardigna.
Sas mustras de ocannu, chi si podent bìdere totu s’annu in sos caminos e istradas de sa bidda, ant a andare a s’agiùnghere a sas installadas in sas editziones coladas de su fèstival, arribbende a unu totale de prus de 400 fotografias.
Sos binchidores de su Prèmiu BìFoto 2024 sunt Cédric Dasesson cun “Luoghi Comuni”, Alessio Cabras cun “Volevo colori forti” e Federica Zani cun “Where the wild things went?”.
In prus, sas àteras chimbe mustras includent “Beyond Plastic Nets” de Annalaura Cattelan, “Le città sottili” de Dario De Dominicis, “Black Sun” de Søren Solkær, “Enguera” de Stephanie Gengotti e “ReExist”, unu progetu de su colletivu fotogràficu Ronin cumpostu dae Alfredo Bosco, Giacomo d’Orlando e Karl Mancini.
Sa die s’at a concruire in sa Fiera dell’Artigianato artistico cun sa Festa BìFoto, chi at a acasagiare sa banda The Corners.
Domìniga 20 santugaine, partinde dae sas 10, in sa sala cunvegnos de sa Fiera at a èssere possìbile leare parte a sas leturas portfolio curadas dae sos fotògrafos Dario Coletti, Dario de Dominicis, Sandro Iovine e Stephanie Gengotti: tra sos traballos presentados ant a èssere seberados tres progetos binchidores de ateretantos prèmios.
Semper in sa Fiera partinde dae sas 10:30, sas presentadas de sos libros Tundhimentas de Francesco Pintore e In the Name of Wellness de Karl Mancini.
Sa manifestatzione s’at a concruire a sas 18 in su Parcu Archeològicu Nuraghe Cuccurada cun s’inauguratzione de sa mustra fotogràfica “Society. Ho perso la strada tra le tue mura”, unu progetu de sos istudiantes de sa FPschool iscola de fotografia de Milano, Andrea Bottura, Raffaella Bova, Luigi Schirinzi. Sa mustra at a èssere visitabile finas a su 31 santugaine 2024.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
