Sa Sardigna tenet unu Rt a 1.12, su pesu prus artu in Itàlia (33,2%) in su perìodu dae su 9 a su 15 de trìulas. Dd’at rilevadu s’Iss-ministeru de sa Salude.
Custa chida, paris cun sa Sardigna, sunt chimbe sas regiones e provìntzias autònomas cun unu balore de Rt prus artu de 1 (Abrutzu, Campània, Ligùria, Provìntzia Autònoma de Boltzanu, Vènetu). Su balore prus artu est in Abrutzu, cun unu Rt de 1.21. Sunt, imbetzes, Sardigna, Sitzìlia e Vènetu sas tres Regiones cun su pesu prus artu. Toscana, Sitzìlia e Ligùria tenent imbetzes sos datos prus elevados pro s’ocupatzione de sas terapias intensivas cun 3,4%, 3,1%, 2,8%, mentras sa Sardigna est in de su 0,5%.
In contu de vatzinatziones, sunt istadas 18.717 sas persones vatzinadas eris in s’Ìsula: 4.728 ant retzidu sa primu dose, 13.989 sa de duas. In prus, sunt arribbadas a Sardigna àteras 53 mìgia doses de su vatzinu Pfizer.
Custu non bastat a firmare sa timoria pro su contàgiu de su virus Corona. In Nùgoro finas a unas deghe dies a oe non si registraiant persones positivas a su Covid, eris, imbetzes, 13 sunt istada postas in cuarantena. Sos nùmeros duncas creschent fintzas in su capulogu e, segundu su sìndigu Andrea Soddu, “mancari non siat galu su momentu de adotare provedimentos, tocat a si subènnere chi su virus est ancora presente e devimus sighire a tènnere cuidadu”.
Su sìndigu at sotadu sa populatzione a fàghere su vatzinu, “chi rapresentat su trastu prus ùtile pro parare fronte a sa pandemia. Est pretzisu a si pònnere mascheredda cando est cunsigiada, e evitare ammuntonamentos a s’abertu puru”.
“Devimus evitare — sighit Soddu — s’arriscu de sa de bator undadas, comente est giai acontessende in àteros logos de su mundu. Semus in pensamentu pro sa mancàmtzia de controllos in sos portos e aeroportos de sa Sardigna pro chie intrat sena perunu tampone, autotzertificatzione o passaportu birde. Tocat chi sa Regione torret a fàghere totus sos controllos pro non bìdere torra unu film giai bidu”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
