“Su chi est acadessende a s’assessore Emanuele Cani est unu signale lègiu de su degradu de sa dibata pùblica. Ant trasformadu una ruta perigulosa dae sas iscalas, chi podiat tènnere àteras cunsighèntzias, in bersàlliu de violèntzia verbale”.
Ddu narat sa presidente de sa Regione, Alessandra Todde, pro canto pertocat sos cummentos a inghìriu de s’intzidente acontessidu a s’assessore de sa Giunta sua su 12 de santandria in su Ministèriu de su Made in Italy.
Un’intzidente chi at batidu a sa destruidura de unu birdi istòricu de valore. Emanuele Cani nd’est rùidu dae sas iscalas de Palazzo Piacentini, isfundende cun sa conca sa famada “Carta del lavoro” de Mario Sironi. Cani, meighinadu in deretura no at tentu feridas graes e at naradu de èssere “dispràghidu meda pro su fatu”. S’òpera, realizada in su 1932 pro su ministèriu de sas Corporatziones, rafiguraiat iscenas de artes segundu s’estètica futurista de su perìodu. Cunsideradu unu documentu istòricu e artìsticu de importu, fiat istada restaurada in su 2014.
Su chi non si cumprendet est pro ite su vìdeu, pigadu dae sas telecameras de su Ministeru, est divènnidu una nova issu etotu e como s’agatat in totus sos giassos de informatzione in lìnia bortende s’atentzione mediàtica dae s’intzidente a una brulla contra a una persona chi est sa vìtima.
“Galu prus grae est sa difusione de sas imàgines de s’intzidente – sighit Todde -. Non connosco sas responsabilidades, ma connosco su printzìpiu violadu: su respetu de sa pessone. Espresso a Emanuele bighinàntzia e giro un’invitu, chi est belle unu dovere tzìvicu, a chie at partetzipadu a custu teatrinu: respetare sa dignidade de sas pessones e ammentare chi non sunt bersàllios”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
