Sa fàbrica chi produet bombas in Domusnoas, sa Rwm de sa sotziedade tedesca Rheinmetall, at a divènnere prus manna. Su Ministèriu de s’Ambiente e de sa seguresa energètica at aprovadu sa protzedura de valutatzione ambientale (Via) pro is traballos de ampliamentu chi sa Rwm at giai fatu.
Su sèberu de su Ministèriu arribat a pustis de una sententzia de su Tribunale amministrativu de sa Sardigna (Tar) chi aiat acòllidu unu ricursu presentadu pròpriu dae sa Rwm contra a sa Regione Sardigna chi no aiat detzisu nudda subra sa regularidade de s’impiantu nou.
Ddu faghet ischire su ministru de su Mimit (ministèriu pro is impresas e su Made in Italy), Adolfo Urso, chi narat: “Est unu passàgiu de importu pro torrare a pesare su territòriu de su Sulcis, como tocat a si impinniare pro prodùere de prus e otènnere prus postos de traballos”.
Sa presèntzia de sa Rwm in Domusnoas dae annos dividet s’opinione pùblica intre chie bolet donare possibilidade de traballu in unu territòriu pòberu (finas is industrias de su logu sunt in crisi dae annos) e chi imbetzes est contra a un’economia de gherra, ca is bombas costruidas in Domusnoas agabbant pro ochire innotzentes comente sutzedet in cada gherra e comente aiat denuntziadu su New York Times in un’aprofondimentu de su 2017 subra sa gherra de s’Arabia Saudita contra in su Yemen. Is bombas de sa Rwm benint bèndidas a medas paisos e duncas benint impreadas in medas conflitos.
Prus bortas unu comitadu de tzitadinos at pedidu una reconversione de sa fàbrica pro sarbare a su matessi tempus is postos de traballu e promovende formas noas de isvilupu pro su territòriu, ma sa protesta non s’est ammanniada. In is annos però at criadu dibata in sa polìtica, difatis in su “campu largu” chi sustenet sa Giunta Todde calicunu fiat contràriu (su partidu de Avs) a s’aprovatzione de s’ampliamentu de sa fàbrica.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
