Est in lìnia su primu episòdiu de sa sèrie web in limba sarda “Sardegna Megastore” chi contat istòrias fitianas de traballadores e clientes de unu grandu tzentru cummertziale.
Sa sèrie faeddada in limba sarda campidanesa, est organizada in 6 episòdios chi ant a èssere publicados cada 15 dies finas a su 25 de santandria. Est dirìgida dae Valeria Galletta e Andrea Assorgia, sa prima produtora e s’àteru regista de sa mustra in Realidade Virtuale “1943 VR sos de I bombardamentos de Casteddu”.
“Renzo Cugis, Lele Pittoni, e Antonella Puddu – est iscritu in una nota de imprenta – ant interpretadu is protagonistas de custa web-sèries noa, caraterizende cada pessonàgiu in modu ispassiosu”. Is atores ant realizadu sa performance pro sa sèrie bestende tutas e cascos pro su “motion capture”. Is movimentos e is espressiones de is caras sunt istadas caturadas, elaboradas e trasferidas subra de is pessonàgios modellados in 3D.
Sa sèrie est prodùida dae sa sotziedade NetPress cun su contributu de sa Regione Sardigna. A s’isvilupu tècnicu ant leadu parte fintzas ex istudiantes de sa Game Maker Academy, iscola de artes e tècnicas digitales: una realidade sarda pro sa formatzione de professionistas de s’indùstria de su videogame.
Sa sèrie est visìbile in su canale Youtube Sardigna Megastore https://www.youtube.com/@SardegnaMegastore
Inoghe su primu episòdiu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
