Adiosu a Alitalia, pro sa continuidade territoriale nch’est Volotea

Adiosu a Alitalia, arribat Volotea: sunt partidos su 15 de santugaine sos primos bolos de sa cumpangia a bàsciu costu chi at a gestire sa continuidade territoriale finas a su 14 de maju 2022.

Dae giòbia si podent comporare, dae su giassu ìnternet e dae s’aplicatzione de Volotea, sos billetes aèreos pro sos collegamentos in continuidade territoriale dae sos tres iscalos de sa Sardigna – S’Alighera, Casteddu e Terranoa — pro sos aeroportos de Roma Fiumicino e Milano Linate. Sos billetes podent èssere achistados siat in lìnia, siat in billeterias, opuru in sas agèntzias de biàgiu.

Sos prètzios previstos pro sos òneres de servìtziu pùblicu e riservados a sos residentes sardos sunt 39 èuros pro sos bolos pro sa Capitale e 47 èuros pro su cabu-logu lombardu. Volotea faghet ischire in una nota chi dae lunis 18 at a intrare a prenu regìmene sa gestione de sa continuidade territoriale, finas a unu màssimu de 266 bolos a sa chida pro sa Sardigna.

Mancu imbucada Volotea e in sos canales sotziales e in sa retza est giai polèmica: difatis, pagora a pustis de s’ativatzione de sa prataforma pro s’achistu de sos billetes, sunt arribados is primos problemas. Ma su vetore at fatu a ischire: “Semus agiornende sa prataforma in lìnia: in sas dies imbenientes su sistema at a èssere efitziente”. Medas sas crìticas finas pro sas tarifas non diferentziadas de residentes e non residentes, ma fintzas sos costos agiuntivos pro sos postos de seberare e pro su bagàlliu.

“Est unu miràculu si in 24 ebbia oras semus giai in lìnia, sende chi su cuntratu est istadu firmadu su 15, a pustis de sas 23 – at naradu Valeria Rebasti, Commercial Country Manager Italia Volotea – semus assetiende su giassu. Pro sa chistione de sos costos agiuntivos – ispiegat – amus aprontadu unu comunicadu chi ispiegat comente sas tarifas in continuidade includent su bagàlliu finas a 23 kg. B’at fintzas unu ligàmene pro sas agèntzias de biàgiu chi ant a pòdere prenotare in manera dereta. Sa Sardigna pro nois est importante, ca semus acapiados a s’Ìsula, acanta tenimus giai bases in Terranoa e Casteddu e immoe nd’amus a abèrrere un’àtera in S’Alighera puru”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*