Su casteddàiu Andrea Mura, at iscritu una pàgina de istòria noa de sa vela, acumprende unu biàgiu èpicu a inghìriu de su mundu in intro de sa Global Solo Challenge, una de is cumpetitziones prus difìtziles e importantes de sa navigatzione in solitària.
A pustis de bator meses in mare, eris su 17 de martzu, Mura in fines est lòmpidu a Sa Coruña, in Galìtzia, otenende siat unu traguardu personale, siat unu resurtadu istòricu pro s’Itàlia. Sa Global Solo Challenge at postu a sa proa s’abilidade e sa resistèntzia de 16 partetzipantes, ma sete ebbia sunt resèssidos a concruire su giru. Mura, cun s’imbarcatzione “Vento de Sardigna“, est arribbadu a su de tres postos, pretzèdidu petzi dae Philippe Delamare e Cole Brauer.
S’amore e su respetu pro su mare ant ghiadu Mura in totu su percursu de custa marrania istraordinària. Sa vitòria sua, mancari is cunditziones malas de su bentu e is guastos chi postu in duda s’arribu finale, est su resurtadu de annos de impinnu e de passione pro sa vela.
A 59 annos, Andrea Mura est unu veteranu de is garas otzeànicas. Giai connotu a livellu internatzionale pro is impresas suas cun su “Moro di Venezia” in sa Copa Amèrica, at finas triunfadu in sa mìtica Route du Rhum, divenende su primu italianu a nche dda fàghere.
Su biàgiu de Andrea est cumintzadu su de 14 mese de ladàmine, cando at lassadu su portu de Casteddu pro printzipiare s’aventura sua a inghìriu de su globu. Sa Global Solo Challenge at printzipiadu in modu ufitziale su 18 de onniasantu; si tratat de ua cumpetitzione sena pretzedentes chi at impinnadu is partetzipantes pro 26.000 mìllios nàuticos sena iscalos e sena assistèntzia, barighende Capu de Bona Isperàntzia, Capu Leeuwin e Capu Horn. In custos bator meses de navigatzione Mura at agiornadu is sighidores suos de totu su mundu cun collegamentos fitianos in Facebook chi concruiat semper cun su saludu in sardu “a si biri“.
Duncas, a “nos bìdere”, a un’àteru biàgiu e a un’àtera vitòria cun Bentu de Sardigna!
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
