A Molentàrgius unu progetu de teatru pro sos giòvanos

Su virus Corona e is limitatziones impostas pro ddi parare fronte, ant cunditzionadu meda sa vida e is relatziones sotziales de is tzitadinos prus giòvanos. Pro donare coddu a sa ripresa de is fainas educativas, lùdicas e de recreu de is pipios e de is pitzocos, s’assòtziu Artisti Fuori Posto, a cumentzare dae abrile finas a cabudanni, at a aparitzare su progetu “Alla scoperta dell’oro bianco di Molentargius – Le Saline”.

S’initziativa, chi faghet parte de su programma “EduCare” e est finantziadu dae su Dipartimentu pro is polìticas de sa famìlia de sa Presidèntzia de su Consìgiu de is Ministros, naschet pro esplorare e torrare a iscobèrrere su patrimòniu culturale, istòricu e paesagìsticu de su territòriu de is Salinas de Molentàrgius, acanta faghet craru is comunos de Casteddu, Cuartu Sant’Aleni, Cuartùciu e Ceraxus.
Cun custa punna ant a èssere ativados bator laboratòrios artìsticos de retzitatzione, tzìnema, iscenegiadura e fotografia, chi ant a interessare giòvanos dae is 8 a is 17 annos chi, movende dae is datos istòricos de is Salinas de Molentàrgius, rilevados gràtzias a s’Archìviu de Istadu de Casteddu, s’ant a ocupare de sa produtzione de un’iscenegiadu-documentàriu e de una mustra fotogràfica dedicados a s’istòria e a is fatos chi pertocant su territòriu de is Salinas de Molentàrgius. Sa documentàriu e sa mustra fotogràfica ant a èssere presentadas a su pùblicu in s’agabbu de cabudanni in s’edifìtziu “Sali Scelti” de s’Ente Parcu de Molentàrgius.

“S’importu e sa netzessidade — si leghet in una nota — de pònnere in atu custu progetu, s’insertat in su perìodu istòricu difìtzile chi amus bìvidu, e galu semus bivende, e chi at contribuidu a creare un’atentzione prus manna a is raportos umanos. Amus chircadu de istare a presu de is àteros cun s’agiudu de sa tecnologia e medas ant torradu a iscobèrrer su significadu beru de su faeddu comunidade. Posca, in manera ispontànea, est acontèssidu chi s’arte si siat proposta comente trastu pro unire a totus, mannos e pipios, pro more de sa capatzidade sua de fàghere bisare e isperare. Is artes imparant, nos agiuant a cumprèndere su mundu e nos inditant a ddu torrare a disegnare mègius”.

Su progetu at a èssere presentadu su 21 de abrile a ora de is 11 in cunferèntzia de imprenta in sa prataforma Zoom. Pro otènnere su ligàmene pro pigare pòdere parte a sa presentada, tocat a iscrìere a s’indiritzu de posta eletrònica info@artistifuoriposto.com.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*