Sàbadu 22 e domìniga 23 de abrile in Àrbus, b’at a èssere s’abertura ufitziale a su pùblicu de su museu Antonio Corda — Arti e Mestieri Antichi della Sardegna. Su museu regollet prus de 2.500 repertos de unu perìodu istòricu chi andat dae su de degheoto e su de binti sèculos chi riguardant prus de chimbanta mestieris antigos de sa Sardigna.
Sa sede sua est in su tzentru istòricu de Àrbus, in sa domo antiga de una famìlia de massajos ricos de sa bidda. S’edifìtziu, chi est istadu torradu a nou rispetende totu sos elementos originales prus significativos, si parti in unu percursu espositivu a prus livellos a fùrriu a sa corte cun putzu chi faghet craru a “Sa Rocca de su de Casteddu”. Su ispàtziu nou donat una panoràmica noa subra sas produtziones, sos connoschimentos e sas tècnicas de traballadura de sos materiales.
“S’idea de su museu – at naradu su fundadore Antonio Corda – naschet de su disìgiu de dare a sa comunidade de Àrbus unu contribuidu personale a sa valorizatzione de su territòriu e mescamente pro pòdere dare balia a sa bidda antiga. Sa punna est sa de costituire una Fundatzione partetzipada pro mantènnere unidu su patrimòniu culturale regortu e amparare sa memòria de su traballu de sos antepassados nostros”.
Su museu at a èssere inchingiadu sàbau a sas 10 de mangianu cun sos saludos de Antonio Corda etotu, fundadore de su museu, de su sìndigu de Àrbus Paolo Salis e de su deputadu Gianni Lampis. Ant a leare parte a sa tzerimònia Giannetta Murru Corriga e Gabriella Da Re de s’Universidade de Casteddu e Gianna Saba, funtzionària de sa Subrintendèntzia archeològica, bellas artes e paesàgiu pro sa tzitade metropolitana de Casteddu e sas Provìntzias de Aristanis e Sud Sardigna.
In sas duas dies de s’inauguratzione medas ant a èssere sas fainas propostas dae sa cooperativa Villa Silli, comente sos interventos de Maria Paola Cordella e sas installatziones de Battistina Casula, cun sa partetzipatzione de sos istudiantes de s’Istitutu professionale de Istadu pro sos servìtzios alberghieros e de sa ristoratzione de Àrbus e de s’Istitutu clàssicu linguìsticu “E. Piga” de Biddacidru.
