Bintisete cuntzertos in 19 localidades de 16 Comunos de su nord Sardigna, pro unu fèstival chi in unu mese at a propònnere mùsica internatzionale in unu cuntestu paesagìsticu de grandu bellesa.
Dae sas marinas de Vignola a sa basìlica de Sacàrgia, dae sa roca de Casteddu Sardu a su casteddu de Tzaramonte, dae sa crèsia de Santu Antiogu de Bisarcio in Otieri a su putzu sagradu de Nulvi, dae sa foghe de su Coghinas a sa crèsia romànica de Santu Pedru in Bultzi, colende dae su tzentru istòricu de S’Alighera e dae sos sartos de sa Gaddura: sunt custos unos cantos iscenàrios acanta, dae su 1 a su 29 de austu, s’at a fàghere sa de bintunu editziones de su fèstival internatzionale “Musica sulle bocche”.
Organizadu dae s’assòtziu Jana Project cun sa diretzione artìstica de Enzo Favata, su fèstival at a propònnere nùmenes de importu de s’iscena jazz comente su percussionista Trilok Gurtu , su duetu cun su percussionista Mino Cinélu e su trumbiteri Nils Petter Molvaer, e su cuartetu de su sassofonista istadunidensu Seamus Blake, cun unu programma chi at a èssere cumpletadu cun su cuntzertu de Giorgio Li Calzi e Manuel Zigante e cun s’addòbiu a s’arbèschida chi domìniga 22 at a bìdere protagonista sa violinista Anais Drago.
Ma protagonistas de custa editzione ant a èssere fintzas artistas chi ant fatu s’istòria de su jazz in Itàlia, comente su baterista Roberto Gatto (s’11 de austu in Costa Paradisu cun su suo Perfect Trio) e sa cantante Ada Montellanico (acumpangiada su 29 in Tergu dae su pianista Enrico Zanisi), paris cun nùmenes istòricos de sa mùsica italiana comente a Mogol e s’Orchestra Medit Voices (su 26 a S’Alighera), su triu de Peppe Servillo, Javier Girotto e Natalio Mangalavite (su 17 a sa foghe de su Coghinas a Codaruina), e a musitzistas afirmados comente a Francesco Orio e Vittorio Cuculo (ambos a Sènnaru su 16 de austu, in triu e in cuartetu), sos chiterristas Paolo Angeli (su 19 a Maltis) e Marcello Peghin (su 23 a Laerru) e sa violista Luciana Elizondo (a s’internu de sa basìlica de Sacàrgia, a Codronzanu su 28 de austu).
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
