In Putzu Idu Assemblea Natzionale Sarda at organizadu sa prima letzione de Yoga in limba. Cantas bias s’intendet nàrrere: “Su sardu non faghet a ddu impreare in tzertos cuntestos. Non tenimus unu limbàgiu tècnicu pro unos cantos arresonos?
Su 11 de trìulas 2024 s’Assemblea Natzionale Sarda at dadu vida a sa prima letzione de yoga in sardu.
Custu gràtzias a Laura Salaris, esperta linguista, ativista e profunda connoschidora de sas tècnicas de rilassamentu orientales, puru maistra de Yoga. Issa at bortadu in limba sarda sa cumplessa terminologia chi girat a inghìriu de custa pràtica.
Sa punna de s’eventu fiat de giùghere su sardu in sas pràticas fitianas, fintzas in registros linguìsticos diferentes de su sòlitu, impreende su Yoga comente a trastu de integratzione linguìstica.
“S’impreu de su sardu in sos cuntestos isperimentales – faghent ischire dae Ans – est unu tema chi mèritat de retzire atentzione, ca nde promovet s’impreu, sa difusione, elìminat sos pregiudìtzios e sas barrieras, ca cunsentit a totu sas pessones de s’intèndere connètidas a custos cuntestos sena discriminatzione”.
Sa letzione est istada una de sos eventos chi s’Assemblea Nazionale Sarda faghet pro promòvere sa limba sarda, pro dda ispainare, l’avalorare.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
