S’albergu difusu pro acollire turistas in is biddas de sa Sardigna. Sa Regione punnat a custa forma de turismu e ddu faghet cun 7,5 milliones de èuro.
S’assessoradu de su Turismu difatis promovet un’interventu nou pro s’isvilupu de su turismu sustenìbile a traessu de su finantziamentu de su sistema de albergu difusu, una forma de ospitalidade chi pertocat is tzentros istòricos de sa Sardigna.
S’assessore de su Turismu, Franco Cuccureddu, at presentadu su bandu in paris cun su professore de Economia de su Turismu Giancarlo Dall’Ara, imbentore de s’albergu difusu, modellu de ospitalidade chi oe benit adotadu in medas paisos in su mundu.
“S’obietivu est costruire un’oferta turìstica prus sustenìbile, autèntica e ispainada in totu su territòriu e in is meses – narat Cuccureddu – chi potzat batire turistas in is tzentros istòricos e sustentare is impresas de su logu”.
A disponimentu b’ant 7,5 milliones de èuro, destinados a entes locales (2,5 milliones) impresas turìsticas “micro” e piticas (5 milliones) pro interventos de recùperu e ricualificatzione de su patrimòniu immobiliare chi giai esistit.
S’albergu difusu est unu modellu, faghet ischire sa Regione “chi avalorat prus che totu is biddas prus piticas, esaltende is aspetos istòricos, culturales e ambientales, agiudende sa rigeneratzione urbana e creende oportunidades econòmicas noas pro sa comunidade”.
Is edifìtzios chi acasagiant is aposentos depent èssere a tesu non prus de 300 metros dae sa “reception”. Is contributos, finas a unu màssimu de 300.000 èuros pro benefitziàriu, benint donados in contu capitale e arribbant finas a su 100% de is ispesas permissas (fora is ispesas pro s’achistu o sa restruturatzione de is immòbiles, pro custos est prevìdidu unu contributu de su 25%). Is progetos devent prevìdere un’investimentu mìnimu de 100.000 èuros e garantire una classificatzione a su mancu de tres isteddos.
Su bandu pùblicu riservadu a is impresas privadas at a abarrare abertu finas a su 17 de santugaine, a pustis at a èssere publicadu su bandu pro is entes locales.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
