S’aumentu de sa violèntzia contra a mèigos e infermieris, no est isceti chistione de òrdine pùblicu. A ddu nàrrere est Claudia Zuncheddu de sa Rete Sarda Difesa Sanità Pubblica a pustis chi in Pirri (Casteddu) unu mèigu est istadu arropadu da una persone in s’istudiu suo.
S’atu de violèntzia contra a su mèigu Roberto Sollai, a cale andat sa solidariedade de sa Rete Sarda, depet fàghere oriolare tzitadinos e istitutziones. No est unu problema de òrdine pùblicu ebbia, narat Zuncheddu, bisòngiat resonare subra de sas càusas de custu fenòmenu chi creschet in Itàlia etotu e bi pònnere remèdiu.
In chimbe annos in Itàlia nch’est istada un’atrempada de violèntzias de belle su 40% . Is servìtzios de Pronto Soccorso, is repartos de psichiatrìa, is guàrdias mèdicas e is mèigos de base sunt is bersàllios. Segundu s’Osservatòriu Natzionale pro sa Seguridade de su personale sanitàriu, in Sardigna in su 2023 sunt istados 138 is episòdios de violèntzia. Is operadores interessados sunt 199 de cales 139 fèminas.
“Sa prima seguridade pro mèigos e infermieris est sa de rèndere efitzientes is servìtzios sanitàrios pùblicos assumende personale, garantende cuntratos de importu e su respetu de sa dignidade professionale. Sa seguridade de garantire a is tzitadinos est sa de pòdere atzèdere a is curas. Est cun custu cuntzetu de seguridade pro totus chi podet èssere limitada e firmada sa violèntzia contra a infermieris e dutores”.
“S’iscontzu – narat Zuncheddu – de sa sanidade pùblica nostra, a cale sa polìtica difatis non ponet remèdiu, determinat sa fua de mèigos e infermieris dae su pùblicu a su privadu, dae sa Sardigna a s’èsteru e a àteras regiones prus organizadas”.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
