Podiat èssere un’istrage. Su fàbbricu in ue s’agatat s’àula magna Vardobasso de su Magisteru de s’Universidade de Casteddu eris a de note nd’est rutu. Su fatu est acontèssidu a sas deghe, in un’ora chi pro fortuna, in intro non bi fiat nemos.
Sos vìgiles de su fogu si nde sunt segurados chi suta s’istrutura no b’at vìtimas e como tocat a cumprèndere comente s’edifìtziu nde siat caladu. “Dae notesta etotu semus traballende pro cumprèndere sas càusas de su tzedimentu — faghet a ischire s’Universidade de Casteddu -, semus collaborende cun sas autoridades e cun sas fortzas de s’òrdine . Podimus nàrrere cun seguresa chi sos edifìtzios fiant bòidos e chi duncas non bi sunt fertos”.
Su fàbbricu beniat impreadu dae sa facultade de limbas e parete chi finas a sas 8, pagas oras a in antis de nde rùere a intro bi fiant istudiantes sighende is letziones. Si su fatu esseret sutzèdidu duas oras prima diat èssere istada un’istrage. Dae oe, s’Universidade at suspèndidu pro totu sa chida sas letziones de unos cantos cursos de Limbas e dae sa chida imbeniente s’ant a sighire in lìnia. Serrada finas a chenàbura sa biblioteca Dante Alighieri.
Oe s’assòtziu universitàriu ‘Reset Unica’ at organizadu una manifestatzione: “Non tenimus faeddos pro su chi est capitadu e pro su chi diat èssere pòdidu sutzèdere — iscrient in Facebook — amus a manifestare pro su deretu a s’istùdiu sena tìmere de mòrrere istrecados”.
Su retore de s’Universidade de Casteddu, Francesco Mola, faeddende cun s’agentzia Ansa at naradu chi finas a immoe non b’est istadu perunu signale chi diat aere fatu pensare a su chi est capitadu, pro ite sos fàbbricos benint controllados cun regularidade.
Oe sos pompieris cun sas iscuadras ‘Urban Search and Rescue’ sunt ponende in seguridade sa zona e sunt compidende chi non bi siant dannos finas in sos àteros fàbbricos de sa matessi àrea.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
