In Casteddu esistet una biblioteca de sos fumetos. Est istadu presentadu in maju Casteddu, dae s’iscritore e regista Bepi Vigna, s’Archìviu multimediale de s’imaginàriu in su Polu bibliotecàriu de bia de Falzarego. Un’archìviu subra sa cultura populare de massa, chi tenet sa punna de catalogare e pònnere a disponimentu de totus custos trastos.
S’archìviu si cumponet de giornaleddos (rivistas, collanas cumpletas, albos, romanzos a fumetos), sàgios subra su tzìnema de animatzione e documentos subra sa televisione, film de animatzione in formadu Dvd, cartas pòveras (figurinas, cartas de giogu temàticas, Tarocchi), rivistas illustradas e satìricas de època, fotoromanzos, seletziones de giornaleddos de ogni banda su mundu, dae sa Tzina de Mao a su Brasile, a s’Argentina, a sa Rùssia.
Sos albos a giornaleddos e sas rivistas sunt partzidos tra sa sede de Casteddu e sa de Santa Maria Navarresa (bia de Lungomare 16) e regollent totu s’istòria de su giornaleddu italianu. Sunt presentes colletziones cumpletas (Corriere dei piccoli 1940, e totu sas annadas dae su 1960 a su 1972), Aventure supereroi (primas editziones italianas de s’Editoriale Corno), ripublicatziones anastàticas e annadas originales de Linus, dae su 1965 a su 1980, sas regortas cumpletas de sas rivistas antològicas printzipales: Totem, Comic Arte, Pilot, Eureka.
Abertu pro voluntade de su Tzentru internatzionale de su giornaleddu de Casteddu, s’archìviu immoe faghet parte de su sistema bibliotecàriu comunale e tenet prus de 10 mìgia documentos.
“Su tzentru nostru regollit materiales e rastros de sa produtzione narrativa populare chi at alimentadu s’imaginàriu nostru – at naradu Vigna – In pràtica, proponimus unu modu nou de bìere s’istòria chi pertocat a totus. Ca nois semus su chi amus bisadu, semus sos libros chi amus lèghidu, sas pellìculas chi amus bidu, sa mùsica chi amus ascurtadu. Pro mèdiu de sos giornaleddos e de sos libros, in sas pàginas de sas rivistas illustradas, in sos film e in sos programmas televisivos seriales, in sas cantzones chi amus istimadu, podimus agatare su chi nos agiuat a cumprèndere mègius a nois etotu e a valutare sos cambiamentos de su mundu chi amus rugradu e a nde cumprèndere sos balores”.
Su traballu de su Tzentru internatzionale de su giornaleddu de Casteddu est cuntzentrende∙si como subra sa catalogatzione de sos materiales de s’Archìviu de su Fumetu Sardu. “Si tratat de unu beru iscusòrgiu – at ispiegadu Elisabetta Randaccio, chi at contivigiadu su sèberu de sos documentos – In sas iscàtulas acanta sunt catalogadas sas òperas de sos fumetistas sardos s’agatant ispantos mannos: non publicatziones, artìculos de giornale ebbia, ma finas traballos pitòricos, iscenegiaduras originales de giornaleddos e romanzos a fumetos in una panoràmica istraordinària de sa creatividade sarda a s’internu de su giornaleddu. Sa catalogatzione in iscàtulas e ischedas de cada documentu agiudat a sa consultatzione e s’istùdiu de sos materiales”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
