Furas de arena in Sardigna: unu problema malu a firmare

Petzi in su mese de trìulas sos agentes de sa Guàrdia de Finàntzia ant secuestradu in s’aeroportu de S’Alighera 50 conchìgios e unu chilu e mesu de arena in ampullas de plàstica. Is finantzieris ant craridu chi arribbaiant dae sa marina de Is Arutas, dae sas Salinas de Istintinu e dae su Lazzaretto de S’Alighera. Su materiale secuestradu est istadu agatadu in intro de valìgias e bursas de sos turistas chi lassaiant s’ìsula.

Si tratat belle semper de istràngios chi si nde bolent leare un’ammentu de sa Sardigna, chi non connoschent o narant de non connòschere sas leges regionales, chi pro custu gestu previdint santziones salidas meda. Ma b’at fintzas casos chi s’arena furada nche agabbat in sos grupos de WhatsApp, acanta s’arena sarda benit iscambiada cun cussa de sos Caràibes o de is ìsulas asiàticas.

Est unu problema malu a risòlvere: sa Regione, mescamente dae su 2017, at detzìdidu de parare fronte a su fenòmenu cun una norma chi punit chie furat, detenet e bendet sena autorizatzione fintzas piticas cantidades de arena, pedras o conchìgia, cun su pagamentu de una multa dae 500 a 3 mìgia èuros.

Sa normativa regionale però no est resèssida a firmare sas furas, nemmancu cun sa campagna de sensibilidade promòvida dae sa regione Sardigna “Portala nel cuore”, cun Geppi Cucciari, su giogadore de basket Luigi Datome e s’atora Caterina Murino comente testimòngios.

Nch’at proadu fintzas s’assòtziu “Sardegna rubata e depredata”, nàschida semper cun sa punna de sensibilitzare sos turistas. «Cun s’iscusa de unu regordu – si leghet in una nota – cada annu medas turistas nde leant dae s’ìsula su chi sa natura at impreadu millènnios pro lu creare. Sa fura de arena est unu reatu”.

Roberto Barbieri, responsàbile mare de su comitadu sientìficu de Legambiente Sardigna, at naradu: “Custu fenòmenu faghet parte de cussu cumportamentu malu chi devimus gherrare e cumbatare cun sa sensibilizatzione e s’informatzione. Difùndere sa cultura ambientale bolet nàrrere a fàghere cumprèndere a sos turistas chi arena e conchìgias andant lassadas in ie, in ue s’agatant”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*