Su servìtziu de neuropsichiatria infantile de Lanusè depet pòdere garantire a sos malàidos curas lestras, seguras e adecuadas. S’apellu dd’at fatu sa Garante regionale pro s’infàntzia e sa pitzinnia, Carla Puligheddu, chi in custas dies at giradu un’invitu diretu a s’assessore regionale a sa Salude, Armando Bartolazzi, pedinde de intervènnere pro garantire diritos uguales a totu sos pipios e sos pitzocos de sa Sardigna.
Segundu Puligheddu, sas polìticas pro s’infàntzia non podent èssere cunsideradas unu costu pro sa Regione, ma tocat a ddas bìdere comente a un’investimentu indispensàbile pro su benidore de sa sotziedade nostra.
“Su casu de su servìtziu de neuropsichiatria infantile de Lanusè – ammentat – est petzi s’ùrtimu episòdiu de medas problemas chi, imbetzes de s’atenuare cun su tempus, paret chi s’agravint. Sos malàidos e sas famìlias issoro s’agatant a s’ispissu a abetare annos una bìsita ispetzialìstica neuropsichiatrica. Amparare sa salude de sos pipios e de sos pitzocos bolet nàrrere permìtere de atzèdere cun pari oportunidade a sos servìtzios sanitàrios, signìficat cumbàtere sa poberesa e promòvere su benèssere intesu comente a echilìbriu fìsicu, mentale e sotziale, ultres a favorire s’integratzione iscolàstica e su deretu a s’istrutzione”.
Sa Garante at espressadu bighinàntzia a cantos bivent in cunditzione de tribulia, custrintos a abetare curas chi no arribbant, e at sollitzitadu totu sa polìtica a s’unire in una mobilitatzione chi pongiat s’atentzione subra de sos bisòngios beros de sos territòrios de s’internu.
“Bartolazzi e s’Asl Ogiastra – at agiuntu – si depent impinnare pro garantire a sos minores su deretu de benefitziare de totu su servìtziu sanitàriu regionale, adotende protzeduras istraordinàrias in gradu de torrare dignidade a custu territòriu. Su sèberu depet èssere su de aterrare sas listas de isetu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
