In Sardigna su 28% de is pitzocas no istùdiat, non traballat e non sighit mancu unu percursu de formatzione. Ddu narat Save The Children in sa de ùndighi editziones de s’Atlante de s’infàntzia a arriscu. In Itàlia, segundu is datos, belle unu millione e 140 mìgia piseddas tra 15 e 29 annos arriscant, intre s’agabbu de su 2020, de s’agatare in sa cunditzione de no istudiare e de non traballare, rinuntziende a is progetos pro s’imbeniente cosa issoro.
E is aspiratziones de is giòvanos sardos? Serradas che topes in sa ratonera: a sufrire de prus sunt is fèminas (28,4%), contra su 27,1% de is fedales òmines. Pertzentuales, pro su chi pertocat is pitzocas, istesiadas meda dae is territòrios prus virtuosos, comente su Trentinu Südtirol. Is datos contant una situatzione mala meda pro sa Sardigna: belle unu giòvanu ogna chimbe (su 17,8%) lassat s’iscola a in antis de su tempus, una pertzentuale meda subra de sa mèdia natzionale chi signat unu tassu de iscàbulu iscolàsticu de su 13,5%.
In Sardigna, su 27,7% de is giòvanos apartenent a su grupu lamadu Neet, est a nàrrere is chi no istùdiant, non traballant e no investint in sa formatzione, su peus de s’iscenàriu a livellu natzionale chi faghet registrare una pertzentuale mèdia de su 22,2%.
In prus, segundu Save The Children, in s’ìsula su 22% de is minores bivet in cunditziones de poberesa relativa. Tra is provìntzias sardas Nùgoro (14,5%) e Tàtari (14,3%) tenent sa pertzentuale prus arta de minores in su totale de sa populatzione, sighidas a pagu tretu dae Casteddu (13,9%).
