Unu logu de memòria, pro ammentare una pitzoca chi non b’est prus, ma finas de agiudu contra a sa maladia. In Pramantellu, in locadidade ‘Bagantinus’ a pagos chilometros dae sa bidda de sa Trexenta, dae su 16 de martzu est abertu torra su “Giardino di Lu” unu tretu in su sartu ue pesant is tulipanos.
S’idea de custu progetu de solidariedade nàschidu in su 2016 est de Maria Fois Maglione mama de Luena iscumparsa cando teniat 37 annos pro more de unu tumore ovàricu. Dae tando Maria at detzisu de agiudare is àteras fèminas chi cada die afruntant sa matessi maladia chi teniat sa fìgia, trasformende su dolore in unu aficu sotziale. Gosi in pagu tempus unu percursu personale est divènnidu una comunidade prus manna fata de voluntarios e donadores chi sighit a crèschere.
Su “Giardino di Lu” est unu logu de bellesa, is frores de cada colore, arrùbios, grogos, birdes, accollint is bisitadores chi podent intrare donende un’oferta e podent pigare is tulipanos. Su dinari de sa bèndida de is frores andat a s’assotziu “Il Giardino di Lu Onlus” chi ddu impreat pro sa chirca contra a su tumore ovàricu.
Su carcinoma ovaricu est difùndiu meda: cada annu sunt 5.200 is casos in Itàlia. “S’obietivu nostru – si podet lèghere in su situ ilgiardinodilu.org – est su de informare subra su tema de sa preventzione chi podet sarbare dae custa maladia”.
Dae pagu tempus est nàschidu finas un’àteru progetu, “L’Orto terapeutico di Lu” pro is fèminas chi afruntant sa depressione dèpida a sa maladìa: un’ortu in ue podent cultivare matas de genia diferente e a sa matessi manera issas podent agatare confortu cun sa natura.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
