Sighende su contu de sa borta colada, custa bia faeddamus de sos àteros chimbe eurogrupos in su Parlamentu europeu.
Su primu in rassigna oe est Renew Europe, grupu nàschidu su 2019 comente resurtu de s’adesione de su Partidu democràticu europeu (bi nde faghiat parte sa Margherita de Rutelli in antis de sa nàschida de su Pd chi, comente amus bidu, est parte de S&D) e de s’Alde (chi in Itàlia fiat rapresentada dae sos Radicales). Renew Europe est de màdrighe liberale e in intro suo bi sunt sos “sorianos” +Europa, Azione e Italia Viva. Chentu e 2 sos parlamentares.
Fatu fatu, cun 72 eletos, bi sunt sos Birdes chi, in prus de aunire sos partidos ecologistas natzionales, lassant logu in intro suo a sos Partidos Pirata e a indipendentistas comente sa manca Erc catalana e sos galitzianos de su Bloco (gasi etotu a sos regionalistas de Femu a Corsica e a sos brètones de Udb).
Cun 68 iscrannos b’est sa dereta cunservadora, cando non reatzionària, de Ecr (in sa sigla s’ossìmoru cunservadores e reformistas). Partidos natzionales de su grupu sunt sos antiabortistas de Fratelli d’Itàlia, su Pis polacu e àteros. Forsis b’at a fàghere parte su partidu de s’ungheresu Orban.
A pustis de Ecr b’est sa dereta natzionalista e èuro-dudosa de Identità e democrazia cun 59 fiados. In intro suo b’est la crème de la crème: su ragrupamentu natzionale frantzesu de Le Pen, sa Lega de Salvini, su partidu austrìacu chi fiat de Haider, sos pegos nieddos de Alternative für Deutschland.
A concruos de totu b‘est sa manca ecologista de su Gue / Ngl (birde e ruju sos colores) cun 37 eletos. In cue b‘agatamus partidos comunistas (a su nessi in sa sigla) e post-comunistas ma finamentas su Sinn Fein irlandesu. Non b‘at eurodeputados italianos in custa legisladura serrende·si. Curiosidade, sos ruju-birdes italianos mirant a duos grupos. Sa banda de Frantoianni a su Gue, sos de Bonelli a sos birdes.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
