B’at una presone federale in Viana, in s’istadu de su Maranhao in su nord-est de su Brasile – una de sas zonas prus pòberas de su Paisu -, ue òmines e fèminas iscontant sa pena in sa matessi istrutura. Inoghe sunt sas fèminas a pagare su prètziu prus artu subinde violèntzias d’onnia manera, maltratamentos e sfloramentos. Su destinu issoro non megiorat cando bessint dae sa galera, pro ite s’agatant costrintas a si prostituire pro subravìvere.
Aici, suor Cristina Rodriguez, una misionària, at mutidu in Sardigna su pàrracu de su Sacru Coro de Cuartu Sant’Aleni, don Gabriele Casu, e at pedidu s’agiudu suo cun apretu. Sa punna est cudda de costruire unu càrtzere feminile e nde bogare custas fèminas dae s’istrutura in ue iscontant sa pena cun sos òmines. In prus: realizare unu forru pro faghere su pane, una pizzeria pro sa formatzione profesionale. Custu, ultres a donare dignidade a sos detenudos at a èssere un’ocasione de riscatu e una manna oportunidade de insertada sotziale.
“So torradu duos annos faghet dae Viana – narat don Gabriele Casu -, a pustis de 12 annos de voluntàriu cue, ma su coro meu de misionàriu est pro sos Paisos comente a su Brasile e pro sas persones chi tenent bisòngiu. Nche siamus moende paris cun unas àteras istitutziones, custu bolet narrere sensibilitzare a su problema e èssere meda gentes in custas ocasiones agiudat a sa resèssida”.
Su progetu. Si mutit: “Dignidade, amparu e formatzione: unu forru e una pizzeria pro sas càrtzeres Apac de Viana in Brasile”, e at a èssere possìbile ddu realizare gràtzias a sa Lege Regionale 19 de su 1996: interventos de cooperatzione e collaboratzione internatzionale cun sos Paisos in bia de isvilupu. Immoi, su parternariadu costituidu, cumprendit s’assòtziu Amigu de sa Missione de Casteddu, de su Comunu de Cuartu Sant’Aleni, de s’Estado de Maranhao in ue s’agatat apuntu Viana.
