Un’app sarda pro cumpudare tumbinos e prevènnere sas alluviones

Controllos de tumbinos e canales 24 a sa die cun sas tecnologias IoT pro prevènnere sas alluviones. Est s’obietivu de Rainapp, impresa finantziada dae s’isportellu Startup de Sardegna Ricerche, chi at brevetadu un’aparatu cun una prataforma software, capatza de imbiare allarmes lestros e localizados cun pretzisione, pro una gestione curreta de sas emergèntzias.

In sos ùrtimos 50 annos pro more de sas alluviones si contant prus de milli vìtimas tra ispèrdidos e fertos, e prus de 170 mìgia isfollados. Nùmeros in crèschida a càusa de sos cambiamentos climàticos e de s’isfrutamentu mannu de sa terra.

Pro custu Rainapp, impresa emergente sarda, at isvilupadu unu sistema pro prevènnere e gestire sos arriscos de sas alluviones: una sèrie de aparatos de installare in sa rete de tumbinos e canales, pro compidare su livellu de s’abba. Sos datos otentos, dant informatziones pretziosas capatzas de compidare s’arriscu de allagamentos minutu cun minutu e in cada caminu, ultres a signalare deretu una situatzione de perìgulu.

Gràtzias a custu sistema sos òrganos prepostos a sa seguridade ant a pòdere agire deretu pro tutelare s’incolumidade de persones e cosas, perfetzionende sas risursas e mescamente reduende sos tempos de interventu.
Cun Rainapp, su còmpudu continu de totu sos paràmetros de arriscu at a permìtere de creare un’alerta non petzi pro sos chi sunt prepostos a su traballu, ma fintzas pro sos tzitadinos. Gràtzias a sa prataforma de Rainapp sas amministratziones ant a pòdere duncas pranificare sos interventos de mantenidura mirados.

In prus, s’anàlisi de sos datos at a permìtere de progetare òperas subra de sa base de sos efetivos bisòngios de su territòriu, e de identificare sas àreas crìticas, suportende sa pranificatzione de interventos urbanìsticos chi puntant a ripristinare sa naturale capatzidade de filtratzione de sa terra, a esèmpiu a traessu de sa realizatzione de àreas birdes noas.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*