Dae sas Alpes a sa Sitzìlia: unu biàgiu ùnicu chi aunit tziclismu estremu, kayak e trekking a traessu de s’Itàlia prus agreste.
Su tziclobiagiadore famadu Lorenzo Barone, 27 annos, est impinnadu in custos meses in s’ùrtima impresa sua: una ventura estrema dae sas Alpes, l’at a sa Sitzìlia, colende dae sas abbas de sa Sardigna. A pustis de àere rugradu s’Iscandinàvia, s’esplodare umbru, at detzìdidu de si dedicare a unu giru inèditu a s’iscoberta de sa variedade istraordinària de sos paisàgios italianos.
Su biàgiu, annuntziadu carchi mese a oe in sos canales sotziales cosa sua, est un’innu a sa diversidade e a sa bellesa de su territòriu italianu: montes niados, bacos, padentes, costas agrestes e grutas suterràneas. Barone at a aunire disciplinas comente alpinismu, kayak, trekking e tziclismu, creende unu percursu perfetu pro chie chircat sentidos fortes fintzas in su coro de s’ierru. “No importat ‘e ue’, ma ‘comente’,” at iscritu in sas pàginas sotziales suas. Como Barone s’agatat in Sardigna, in ue at afrontadu sa primu parte de su percursu in kayak. In Facebook at contadu sos preparativos: “Duas dies a oe apo retzidu su kayak piegàbile de Oru Kayak, modellu Coast XT. Custu trastu, cumpatu e manìbile, m’at permìtitu de incroire sa Sardigna in custu biàgiu.”
Acumpangiadu dae s’amigu suo Jack, Barone at aprontadu s’echipagiamentu e, movende deae portu de Palau, at fatu sos primos 26 chilòmetros fatu de sa costa sarda. “Pagaiare in custas abbas, sena su turismu de massa, adobiende petzi carchi piscadore locale, mi dat unu sentidu de paghe e de trancuillidade chi non potzo descrìere”.
Lorenzo Barone no est unu noitolu. Su primu biàgiu suo l’at fatu a 18 annos in Frantza e in Ispagna cun una bitzicleta improvisada, e dae tando non s’est firmadu prus. Est lòmpidu a Capu Nord in su coro de s’ierru, at pedaladu in sa Pamir Highway e rugradu su Sahara in istiu. Intre sas impresas suas prus atrividas, b’est s’esploratzione de sa Sibèria, sa rugrada de s’Àfrica e de s’Àsia in su 2022, e sa traversata de s’Islanda cun iscì e islita.
Como, in custa marrania noa at a bisisitare s’Itàlia, colende dae sas Alpes a sos Apenninos in bitzicleta, naighende sas costas sardas in kayak e concruende cun unu trekking in su coro de sa Sitzìlia. “Unire disciplina e natura est sa manera mea de bìvere,” at declaradu, sighende a ispirare mìgias de sighidores cun sa filosofia sua de vida e s’ispìritu lìberu suo.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
