Non si firmat in Sardigna sa protesta contra a su Thyrrenian Link su cavu chi at a collegare, suta a su mare, sa Sardigna cun su restu de s’Itàlia pro sa frunidura de s’energia elètrica. Dae meses in Ceraxus is ativistas de su comitadu “No Thyrrenian Link” s’oponent a is traballos chi prevident s’ispropiaméntu de unos cantos terrinos agrìculos.
Mèrcuris sa politzia est intervènnida in s’àrea de Matta Masonis denuntziende oto persones pro s’ocupatzione de su terrinu destinadu a un’istatzione de cunversione elètrica de Terna. Dannu, ocupatzione abusiva de terrinu cun declaratziones de pùblica utilidade e violèntzia privada: custas is denùntzias.
Su provedimentu arribbat a pustis dae una cuerela presentada dae Terna in su mese de ladàmini. In su merie de sa matessi die àteros ativistas si sunt addobiados in s’istrada istatale 387 pro protestare contra a s’isgòmberu de su presìdiu.
Solidariedade a is ativistas de sa “rivolta degli ulivi”, gasi est istada definidu su chertu a pustis chi medas ulivos fiant istados irraighindos dae unu terrinu agrìculu, arribbat dae su grupu indipendentista sardu nou de Repùblica chi definit su Tyrrhenian Link “unu progetu dannosu pro sa Sardigna, chi giai produet energia in etzessu respetu a is netzessidades natzionales”. Repùblica ammentat “sa regorta de prus de 210.000 firmas contra a s’ispeculatzione energètica”, chi testimòniat s’opositzione de is sardos a progetos coberados comente sachizet de sas risursas locales”. Solidariedade arribat finas dae is indipendentistas de Lìberu chi faeddant de “ennèsimu fatu de prepotèntzia coloniale.”
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
