Su Caminu Mineràriu de Santa Barbara otenet unu reconnoschimentu mannu agiudichende·si su Global Choice Award de Komoot unu giassu in lìnia, cun unos 50 milliones de personas iscritas, dedicadu a su turismu a s’àera aberta.
Sa tzerimònia s’est tenta in s’àmbitu de sa Cmt de Stoccarda, fiera internatzionale de importu dedicada a turismu e tempus lìberu. Su Caminu Mineràriu de Santa Barbara at bìnchidu sa finale contra a Tourspain, Comunu de Gènova, Trans Canadà Trail (Canadà), GT 20 Bike (Còrsica) e Sauerland-Höhenflug (Germània).
Su reconnoschimentu avalorat unu progetu ùnicu: un’itinerario a aneddu longu prus de 500 chilòmetros in su sud-ovest de sa Sardigna, chi rugrat paisàgios de ispantu intre Surcis Iglesiente, Arburese e Guspinese, tochende bidditzolos mineràrios betzos, minas istòricas, padentes seculares, sartos e tretos de costa.
In is annos 2024-2025 su Caminu at registradu belle 40.000 presèntzias, cun una crèschida de su 30% in su 2025 respetu a su 2024. In crèschida fintzas sa presèntzia de istrangios, prus che totu de turistas bènnidos dae sa Germània.
In sa motivatzione ufitziale de su prèmiu, benet sutaliniadu comente su Caminu apat conchistadu sa comunidade de is iscritos fintzas gràtzias a sa presentada realizada, chi riproduit bene sa mapa ufitziale e ponet a disponimentu trastos pràticos pro pranificare su biàgiu.
“Custu prèmiu – narat Mauro Usai su presidente de sa Fundatzione de su Caminu Mineràriu de Santa Barbara – est unu reconnoschimentu pro is comunidades rugradas dae escursionistas e tziclistas, e chi ddu rendent biu cada die cun unu traballu cumpartzidu e costruidu in paris cun sos territòrios. Su Global Choice Award cunfirmat sa proposta de unu turismu lentu, sustenìbile, profundu, capatzu de unire caminu, connoscèntzia e raportos umanos”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
