Su Cunsìgiu de is Ministros at annuntziadu su recursu contra sa lege regionale de sa Sardigna n. 26 de su 18 cabudanni 2025, chi disciplinat «protzeduras e tempos pro s’assistèntzia sanitària regionale a su suitzìdiu assistidu in manera mèdica». Pro su Guvernu, sa norma est, “in manera assotuta”, foras de sa cumpetèntzia regionale e andat addae de is funtziones de s’istatutu de sa Regione, violende duncas sa Costitutzione italiana.
Pro Palàtziu Chigi, sa lege sarda “lèsiat is cumpetèntzias esclusivas de s’Istadu in matèria de ordinamentu tzivile e penale e de determinatzione de is livellos essentziales de is prestatziones chi pertocant is deretos tziviles e sotziales”. Su Guvernu at remonadu mescamente s’artìculu 117 de sa Costitutzione: a bisu suo, sa norma regionale non rispetat su segundu coma (in is lìteras l) e m)) e su de tres comas.
Sa lege sarda in contu de “fine vida” dd’aiat aprovada sa giunta regionale comente risposta a su bòidu normativu natzionale. In mese maju su Cunsìgiu regionale aiat aviadu s’iter cun auditziones pùblicas: intre is sustenidores ddoe fiat fintzas s’Assòtziu Luca Coscioni. Segundu s’abogada Filomena Gallo, segretària natzionale de s’assòtziu Coscioni, sa lege “no agiunghet nudda a cantu istabilidu dae sa Consulta, ma definit protzeduras prus craras a livellu regionale”. Is crìticas non sunt mancadas.
Piero Comandini, presidente de su Cunsìgiu regionale sardu, s’esecutivu “at pèrdidu ocasione pro dare una risposta de tziviltade” e at sutaliniadu s’apretu de garantire libertade pro is tzitadinos chi non podent prus èssere curados in modu eficatze. Roberto Deriu (Pd), primu firmatàriu de sa lege, at nadu ca su testu regionale est “in su surcu de sa Consulta” e ca sa de su Guvernu est una positzione petzi ideològica, pro custu est prontu a difèndere sa norma dae in antis sa Corte Costitutzionale.
A s’àtera banda, pregiadu meda s’assòtziu Pro Vita & Famiglia Onlus, chi in deretura aiat pedidu a su Guvernu de impugnare la lege, essende chi “andat contra is cumpetèntzias esclusivas de s’Istadu” e rapresentat unu perìgulu pro is persones prus fràgiles.
Su casu de sa Sardigna s’insertat in unu panorama galu sena una lege orgànica in contu de su “fine vida”. Peri si sa sentèntzia de sa Corte Costitutzionale (n.242/2019) apat abertu su caminu a su suitzìdiu assistidu in manera mèdica in unas cantas cunditziones, s’Istadu no at galu aprovadu una regulamentatzione cumplessiva.
Como, sa risposta de su Cunsìgiu regionale a su Guvernu aberit s’àidu a unu possìbile recursu dae in antis sa Corte Costitutzionale, chi at a dèpere istabilire si sa Regione tèngiat cumpetèntzias subra un’argumentu gasi sensìbile o si, comente a sustentat s’esecutivu, sa matèria est de cumpetèntzia esclusiva de s’Istadu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
