S’intìtulat “L’amore e la Gloria. La giovane Deledda” su film iscritu e dirìgidu dae sa regista Maria Grazia Perria chi contat sa vida de s’ùnica fèmina italiana premiada cun su Nobel pro sa literadura in su 1926.
Sa pellìcula arribbat a su su tzìnema cando sunt de pagu tempus colados is 150 annos dae sa nàschida de Grazia Deledda. L’ Amore e la Gloria cheret contare comente una fèmina giòvana de una tzitade pitica comente Nùgoro (tando cun prus o mancu 5.000 abitantes) siat arrennèschida a lòmpere duos obietivos chi teniat: s’amore e sa glòria. Sa pellìcula contat 12 annos de sa vida de s’iscritora. Cumintzat in su 1898 cando a 17 annos pùblicat su primu contadu suo Sangue Sardo e acabbat in su 1900, cando a 29 annos còjuat Palmiro Madesani e movet conca a Roma.
Prodùidu dae Salvatore Cubeddu pro Terra de Punt srl, su film est istadu realizadu cun su contributu de sa Regione Autònoma de sa Sardigna (a traessu de su Bandu de sa lege regionale 15/2006), de sa Fundatzione Sardigna Film Commission (Fundu Location Scouting, Filming Cagliari), de sa Fundatzione de Sardigna e de su Ministèriu de sa Cultura.
S’anteprima natzionale est prevìdida in Nùgoro, su 18 de maju, ant a sighire diversas projetziones in Sardigna e una distributzione natzionale in tzitades italianas comente pro narrere Roma, Milano, Firenze, Bologna, Pisa, Palermo e Bari.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
