Sa Domo de sa poesia cantada: in Silanos su biàgiu in su mundu de sa gara poetica sarda Su bisitadore at a èssere protagonista issu etotu de sa narratzione, de is logos e de is atziones contados pro mèdiu de unu percursu lùdicu-didàticu.

Màsala e Mura
Màsala e Mura. Foto: sapoesiacantada.it

Silanos est pronta a acollire bisitadores dae totu sa Sardigna. Dae su 18 de maju si sunt abertas is ghennas de sa Sa Domo de sa Poesia Cantada, su progetu finantziadu dae sa Regione e pensadu dae sa bonànima de Paolo Pillonca, iscritore e giornalista famadu.

Ma pro ite est istada isseberada Silanos? Sa risposta est fàtzile meda. Silanos est s’ùnica bidda de sa Sardigna a àere tentu, in su matessi tempus e pro prus de barantaghimbe annos de fila de pare, duos poetas improvisadores de primore assolutu: Frantziscu Mura e Mario Masala.

Is ispàtzios culturales sunt istados aprontados in is aposentos de sa Domo museu Aielli pro ofèrrere a is bisitadores unu biàgiu tra is connoschèntzias e is fantasias de is poetas e de s’ambiente acanta biviant e si relataiant. Pro su bisitadore at a èssere unu momentu de importu mannu, difatis issu etotu at fàghere parte de sa narratzione, de is logos e de is atziones contados pro mèdiu de unu percursu lùdicu-didàticu, pensadu e cuncordadu a posta pro is levas noas.

Sa Domo Aielli est istada posta a disponimentu dae sa Comuna a sa sotziedade Domus de janas de Fabio Pillonca chi at donadu su materiale frutu de 50 annos de chircas in su campu conduidas dae su babbu, su biadu de Paolo Pillonca. Semus chistionende de un’archìviu de prus de 3 mìgia garas.

In is locales sunt istados assentados pannellos illustrados, cun is acrarimentos in italianu e in inglesu. Is pannellos sunt partzidos in bator livellos: su primu, “didàticu”, contat sa poesia estemporànea in Sardigna, s’istrutura sua e s’ambiente in ue s’est isvilupada. In su segundu livellu bi sunt is protagonistas sardos de prus de unu sèculu de istòria. Su de tres proponet is curiosidade de su mundu de sa poesia a bolu. S’ùrtimu livellu imbetzes est cussu emotzionale, dedicadu a sa chirca e a is aprofundimentos in s’archìviu de Domus de janas editore: noas, curiosidades, biografias de is poetas, garas àudiu e vìdeu e trascritziones.

In prus, cun sa tècnica de sa simulatzione e imitatzione, is bisitadores prus atrividos ant a pòdere imparare ispassiende·si, provende una gara poètica in su palcu assetiadu in intro de su museu.

Sa bìsita durat un’ora e mesu, pro custu si cussìgiat de prenotare cun tempus. S’intrada a su museu de Sa Domo de sa Poesia Cantada si podet fàghere isceti cun aparauladura, compilende s’apòsitu mòdulu, opuru mutende is nùmeros de is organizadores.

L.M.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*