Su campione de s’ìpica sarda e italiana teniat 64 annos
Su fantinu de Lanusè, classe 1960, si nch’est mortu giòbia su 23 de maju, pro more de unu male malu. S’ìpica italiana e sarda perdet unu de sos protagonistas istòricos suos, Angelo Godani. Fantinu e allenadore, òmine de caddos finas a s’ùrtima die de coa, s’est dèvidu arrèndere a 64 annos.
Angelo Godani, nàschidu in Lanusè su 27 martzu 1960, connotu a totus comente Angheleddu, at bìvidu prus de 40 annos semper andende a caddu, dedichende·si cun passione e professionalidade a sas cursas a su galopu. Sa carriera sua est istada prena de maicantas vitòrias, sas prus de importu otentas in Sardigna etotu, in ue at bintu pro chimbe bias su Derby Sardo, sa cursa prus importante de s’ìpica sarda. Su primu trìunfu fiat arribbadu in su 1986 cun Infinito, sighida dae àteras vitòrias in su 1993 cun Rass de Ozieri, in su 2003 cun Eros de Ozieri, in su 2010 cun Odyseus, e s’ùrtimu in su 2016 cun Urlo de Aighenta.
Angelo at bintu su Gran Premio Sardo in su 2002 cun Dama Disamistade e at triunfadu in sa proa Internatzionale de su 2017 cun Viollet Le Duc, a pustis de l’àere binta pro sa prima bia in su 2002 cun Dalim. At in prus conchistadu s’Internatzionale in su 2003 cun Egidio e su Derby Italianu de su PSA in su 2018 cun Zefiro di Chia. Tra sas vitòrias suas cun sos caddos de ratza, ammentamus su Gran Premio Regione Sarda de su 1997 cun Pontida, su Gran Premio in Tàtari in su 1994 cun Hasim e in su 2004 cun Omargabriel, e su Tzitade de Biddexidru cun Al Cuore Ramon.
Sas vitòrias de Angelo non si firmant inoghe: at bìnchidu su traditzionale Poncia de Milanu in su 1991 cun Malvarose e at otentu resessidas importantes in Livorno, Pisa, Grosseto e Firenze cun Purple Cap, cun cale at otentu fintzas unu de tres postos in Listed intre su 1995 e su 1996. Cun sos angluàrabos tocat a mentovare sas vitòrias cun Rass de Ozieri e Eros de Ozieri in su Derby Italianu de su Mezzosangue in su 1993 e 2003, e cudda cun Umbria Rossa a Varese in su 1996.
Ma Angheleddu, a in antis de bìnchere comente fantinu e atleta, at bintu mescamente comente òmine. Pessonàgiu irònicu e icònicu, l’istimaiant totus: cumpàngios, meres, allevadores e amantiosos. Sas marranias suas e su modu de fàghere suo ant marcadu pro 40 annos s’ìpica sarda, donende·li unu logu in s’eternidade.
Foto e info: https://spoonriver.biz/
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
