A trint’annos dae s’istitutzione de sa “Die de su pòpulu sardu”, Assemblea Natzionale Sarda tzèlebrat su 28 de abrile sa segunda editzione de sa Die de sa Sardigna in Casteddu, tzitade chi fiat istada sa capitale de sa “Sarda Rivolutzione”. Initziativas fintzas in Tàtari.
Ocannu puru ANS, su 27 e su 28 de abrile, at a tzelebrare sa Die de sa Sardigna in su tzentru istòricu de Casteddu, pro ammentare sa bogada de is piemontesos in su 1794 e s’avolotu contra su sistema feudale de is Savoja.
Chenàbura su 28 de abrile, a ora de is 11, ddoe at a èssere sa cummemoratzione de is màrtires de sa Sarda Rivolutzione in s’Arcu de Palabanda e a pustis in s’Ortu Botànicu, acanta, paris cun Corona de Logu, s’assòtziu de is amministradores indipendentistas, at a èssere posta una corona de frores pro ammentare is màrtires sardos chi aiant fatu s’ùrtimu tentativu pro si liberare dae s’opressione de is Savoja.
A sighire sunt prevìdidas passigiadas ghiadas in limba italiana, inglesa e sarda, cun sa collaboratzione de Impronta Tour Sardegna e Your Sardinia Experience, in is logos in ue fiant acontèssidos is fatos prus de significu de su 28 de abrile de su 1794, colada a s’istòria cun su nùmene de “Sa Dì de s’aciapa”, in prus, paris cun A.G.E.S. Scout de Sardigna, at a èssere aparitzada su giogu de s’iscusòrgiu pro is pipios, pro imparare s’istòria de Sa Die a is minores.
A totu die, ant a èssere presentes medas artistas comente Claudia Aru, Andrea Andrillo, Pierpaolo Vacca, Celè, Andrea Deiana Porcu e Dedalo, ant a istentare su pùblicu in is caminos de Stapaxi. A merie, in totu is duas dies de festa, s’ant a serrare cun sa mùsica de is DJ Pille, Nice e Palitrottu. Su sero de su 28 ddoe at a èssere tretu fintzas pro is ballos sardos acumpangiados dae is organitos de Tore Cosseddu, Luca Lai, Claudio Serra e Simone Tolu.
Sa manifestatzione est istada cuncordada gràtzias a su contributu de Old Square, Brewbay, Spritz Time, NUR Archeopark Seleni, EjaTV e Radio Televisione Sarda e a sa collaboratzione de maicantos locales, tzilleris e ristorantes de Casteddu.
Pro s’ocasione s’assòtziu ANS invitat a totus is chi ant a partetzipare a sa manifestatzione a si pònnere calicuna cosa de colore ruju e a batire una bandera sarda, o a su mancu dd’apicare a sa ventana de domo.
Su programma cumpletu si podet cumpudare a su sighente acàpiu: https://www.assembleasarda.org/sa-die/programma-2023/
Pro is passigiadas ghiadas e pro is scout est cussigiada s’aparauladura iscriende a info@assembleasarda.org.
Fintzas in Tàtari , Assemblea Natzionale Sarda, at leare parte a is tzelebratziones de sa de oto editziones de Beranos Sardos (27-28 abrile), promòvidu paris a is assòtzios Arvures, Plastic Free Odv Onlus, Sa Domo de Totus e Teatru S’Arza.
