“Architetture Vegetali”, sos caminos arborados de Casteddu

Cun sa punna de interessare sos tzitadinos a su passadu, presente e benidore de sos caminos arborados de Casteddu, cunsiderados comente architeturas vegetales, eredade istòrica e risursa de importu pro sa calidade urbana locale, su Tzentru comunale de arte Il Ghetto, dae su 23 trìulas a su 24 santugaine, acasàgiat “Architetture Vegetali. Le Strade Alberate di Cagliari”, una mustra pensada dae s’architetu Marco Cadinu e contivigiada paris cun s’agrònoma Tiziana Sassu.

Sa mustra, chi faghet parte de sa programatzione de s’Assessoradu a sa Cultura de su Comunu de Casteddu, est realizada dae su Cunsorzio Camù gestore de sos servìtzios de su Tzentru Comunale de Arte e CulturaIe Il Ghetto de Casteddu in A.T.I. S’initziativa cheret fintzas tzelebrare su de 25 anniversàrios de sa manifestatzione Cagliari Monumenti Aperti, gràtzias a sa cale, in su 2000, pròpiu su monumentu de su Setighentos de bia Santa Croce, nàschidu comente Caserma San Carlo, fiat istadu abertu e torradu pro semper a sa tzitade. S’allestimentu de sa mustra est de Salvatore Campus , cun progetu gràficu de Daniele Pani.

Dae s’agabbu de su Setighentos in susu in Casteddu, comente in medas tzitades europeas, sos caminos arborados mudant s’imàgine de s’ispàtziu urbanu. In sas antigas tzitades fortificadas, medas cun ispàtzios birdes a s’internu issoro e interessadas dae una crèschida demogràfica manna, benint pranificadas importantes funtziones urbanas: parcos, caminos e pratzas arboradas, ortos botànicos.
Sas bestes birdes noas de sas tzitades europeas divenint in pagu tempus motivu de bàntidu e de tzelebratzione de sa bellesa de sos logos, e benint imprìmidas in sas cartulinas, in sas primas fotos de època e in sas mapas.

S’espositzione, duncas, si presentat comente unu biàgiu a s’iscoberta de sas arboradas de sa tzitade, patrimòniu istòricu europeu e indicadore de sa calidade urbanìstica e ambientale de sas tzitades a su mancu dae su primu Otighentos in susu e su reconnoschimentu de sa calidade e cantidade manna de arboradas progetadas in su tempus in Casteddu. Unu percursu de valorizatzione de importantes fundos documentales e iconogràficos chi at a portare a su connoschimentu de sa vegetatzione chi allichidit unos cantos importantes viales tzitadinos dae puntu de bista istòricu e sientìficu, ma fintzas de sos contos de òmines chi ant pranificadu o in manera materiale realizadu custos “purmones birdes” de Casteddu.

Sa mustra s’arrichit de su contu cuntemporàneu, s’ograda atuale e s’interpretatzione artìstica de 5 fotògrafos casteddajos (Noemi Didu, Gabriele Muscas, Francesca Mu, Roberto Murgia e Dietrich Steinmetz) chi ant a propònnere a sos bisitadores sa bisione personale issoro de custos “monumentos” vegetales, testimoniende s’importu de sa fotografia in su panorama artìsticu-culturale tzitadinu, siat dae puntu de bista documentàriu siat dae cussu estèticu.

Su percursu espositivu at a èssere cumpletadu dae unos cantos progetos ispetziales, tres itineràrios fatu de arboradas presentadas in sa mustra. Disponìbiles pro iscolas e pùblicu lìberu, ant a èssere s’ocasione pro osservare cun ogros diversos duos caminos arborados de s’Otighentos (Arburada Bonucaminu e su tretu dae su Terrapieno a sa Dàrsena) e s’arborada moderna de bia Dante.

Pro aparauladuras, oràrios e billetes est possìbile mutire su Tzentru comunale de Arte Il Ghetto a su nùmeru 070 6670190 o iscrìere a s’indiritzu ilghetto@consorziocamu.it


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*