Arte, cultura, formatzione, mustras, laboratòrios, ispetàculos. Proite fintzas cun custas armas si gherrat s’ispopolamentu de su tzentru-Sardigna. At a provare a donare respustas “Abitare connessioni”, su fèstival de sos burgos chi at a bìdere protagonistas sos Comunos e sas Comunidades de Orane, Mamujada, Orgòsolo e Otzana dae su 2 a su 7 austu.
Su progeto, pesadu dae Sardarch, e fatu gràtzias a sas bator amministratziones comunales, est binchidore de s’avisu pùblicu “Borghi in Fèstival”, promòvidu dae sa Diretzione Generale Creatividade Cuntemporànea de su Ministeru de sa Cultura, seletzionadu paris cun unos àteros 7 in totu Itàlia e s’ùnicu in Sardigna.
S’intreu programma de sa chida – presentadu a Orane dae sos organizadores, cun sos sìndigos Antonio Fadda, su mere de domo, Luciano Barone (Mamujada), Franco Saba (Otzana), Dionigi Deledda (Orgosolo) – est ispiradu a s’artista nòdidu Costantino Nivola.
Su fèstival est, difatis, pensadu comente a un’interventu chi contribuit a torrare a fundare s’ispàtziu pùblicu, a recuperare e tèssere relatziones, trasformare sos raportos intre sas persones, aporrende sas Comunidades in pratza. E pro fàghere custu, dae su 2 a su 7 austu Mamujada, Orane, Orgòsolo e Otzana ant a èssere s’iscenografia de unu programma artìsticu chi naschet de s’addòbiu intre traditzione e cuntemporaneidade, intre sa richesa de sas traditziones locales e sa visiones turisticas lamadas a si mesurare cun unu patrimòniu culturale ancora intregu.
Su programma de su Fèstival est istadu costrùidu pro pònnere in moto protzessos de iscritura partetzipada de su territòriu: Comunidades locales, istitutziones, operadores culturales e econòmicos, Universidades, sìngulos artistas e ricercadores ant a traballare paris subra de su territòriu, pro agatare formas noas de prodùere e “fàghere” in unu sistema integradu.
In su mentras, Abitare Connessioni at a èssere fintzas formatzione e aprendimentu: bator dies, a su mangianu, b’at a àere sa Summer School pro sos pitzocos, curada dae Sardarch cun s’Iscola de economia Tzivile subra de sos temas de su protagonismu de giòvanos, de sa cooperatzione, de s’economia tzirculare, de sa rigeneratzione territoriale in una base culturale, de sas impresas de comunidade, de sos benes comunos, de sos protzessos de ativatzione dae su bassu e de sos guvernos partetzipativos sustenìbiles.
Pro ònnia die est prevìdidu unu calendàriu mannu de eventos culturales, de sas Ofitzinas Comunitàrias, dedicadas a sas traditziones locales, a sa setzione Sonos in Barbàgia a cura de sa Fundatzione Teatru Lìricu, a su programma de arte pùblica curadu dae Maria Paola Zedda cun sas istitutziones de museos de su territòriu, Fundatzione Nivola a Orane e Museu de sas Mascaras in Mamujada. Su sero, posca, sos burgos ant a devènnere palcos e iscenàrios pro sas performance, frutu de sas residèntzias artìsticas, de mùsicos, dantzadores, video maker, tzitadinas e tzitadinos comunos.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
