Dae su 4 a su 6 de austu 2023, su fèstival Appetitosamente de Siddi est prontu a regalare emotziones, sabores e cultura in sa de sèighi editziones suas. S’eventu, ammaniadu dae su Comunu de Siddi paris cun su comitadu Appetitosamente e sa cooperativa Villa Silli, at a motivare sos partetzipantes in un’esperièntzia multisensoriale e interessante.
Appetitosamente no est petzi unu fèstival dedicadu a su màndigu de calidade ma rapresentat una tzelebratzione de sas traditziones locales, de s’identidade culturale e de s’addòbiu cun diversas realidades. Su tema de ocannu, “màndigu e identidade”, punnat a indagare su màndigu comente mèdiu pro si connètere cun àteras culturas e fraigare relatziones intre sas persones. Sa tarea printzipale de sa manifestatzione est avalorare sos produtos agroalimentares de primore de su territòriu e dare boghe a chie, cun passione e capassidade, traballat sas matèrias primas furriende∙las a liconias culinàrias de ispantu.
Intre sos eventos chi non faghet a pèrdere, s’ant a acumprire laboratòrios dedicados a sos segretos pro s’aprontu de sa panada, sa richesa de su limone, sa maghia de su cognac, s’arte de sas ispètzias e sa bonesa de sa botarga. Sos partetzipantes ant a tènnere sa possibilidade de iscobèrrere e imparare de sas manos espertas de coghineris famados comente Pierluigi Fais e Errico Recanati, chi ant a trasmìtere sos connoschimentos issoro e sas tècnicas culinàrias chi ant dadu fama sa coghina de su logu.
Ultres a sas esperièntzias gastronòmicas, Appetitosamente at a èssere animadu dae ispetàculos e cuntzertos chi ant a tocare su coro de sos istràngios. Intre sos artistas presentes, tocat a remonare sa presèntzia de Tosca e su Quintet suo, unu cuntzertu de non pèrdere pro sos amantiosos de sa mùsica e de sa poesia. Su repertòriu de Tosca at a carrare sos ascurtadores in unu biàgiu de sentidos, acumpangiadu dae sa maghia de su violontzellu, de sa chiterra e de sas percussiones.
Ateretantu dèchidu at a èssere s’ispetàculu de Don Pasta, chi cun su Food Sound System suo at a unire coghina, mùsica e narratzione pro ingendrare un’esperièntzia teatrale sena paragones. Unu beru imbòligu de traditzione e innovatzione, capassu de interessare totu sas generatziones presentes.
Pro sos apassionados de giornaleddos e de arte, Appetitosamente at a acollire a Takoua Ben Mohamed, una fumetista, illustradora e giornalista gràfica italu-tunisina de grandu talentu. S’addòbiu suo, ” una fumettista tra i primi”, at a èssere un’ocasione pro riflètere de identidade, de su màndigu pro sa mente e s’ànima, e de sa vida matessi, esplorende s’arte de su giornaleddu comente mèdiu pro espressare ideas e istòrias.
In fines, pro comintzare sa domìniga cun su pee giustu, sos ispetadores ant a èssere ingangulitzados dae una “Colazione dall’Orco”, acumpangiada dae s’esibitzione istravanada de Moses Concas cun su sonete a buca cosa sua. Unu cuntzertu mangianile chi promitet de èssere un’esperièntzia interessante, imboligada dae sa maghia de su sonu de s’armònica.
Appetitosamente est meda de prus de unu fèstival enogastronòmicu: est un’ocasione pro iscobèrrere sa cultura e sas traditziones de su territòriu, pro addobiare persones apassionadas e de talentu, pro si lassare carrare dae sa mùsica, dae s’arte e dae su sabore de màndigos ispantosos.
Sa biddighedda de Siddi, duncas, si preparat a acollire totus sos chi ant a chèrrere partetzipare a custa festa de pòpulu, contribuende a pesare una consièntzia noa subra sa cultura alimentare e a cumpartzire momentos ùnicos de crèschida e iscoberta.
