“Is pastores de is biddas a inghìriu a su polìgonu militare de Cabu Teulada ant a pòdere pàschere su bestiàmene in is terrinos de sa base in cunditziones de seguridade”. Dd’at naradu su presidente de sa Regione Christian Solinas, cummentende su Disciplinare de impreu nou de s’àrea de su Polìgonu. Segundu su cuntratu sutascritu tra su Cumandu militare, s’Agèntzia de su Demàniu, s’assòtziu interprovintziale Pastores Sardos e is sìndigos de Teulada e Sant’Anna Arresi, pro is 5 annos imbenientes is allevadores ant a pòdere fàghere imbucare is pegos issoro in is 2.651 ètaros de terrenu de su polìgonu de Cabu Teulada. “S’acòrdiu nou- at agiuntu su presidente Solinas- est cumintzende a donare is frutos suos, a cunfirma de comente sa bona amministratzione e sa collaboratzione tra Istitutziones portet a resurtados profetosos pro sa comunidade”.
Sunt colados binti annos dae sa pretzedente intesa tra Regione e Polìgonu chi regulamentaiat s’impreu de is terrinos demaniales in intro de sa base. S’acòrdiu nou arribat a pustis de sa firma de su mese de idas a Villa Devoto tra sa Regione e su cumandante de s’Esèrtzitu in Sardigna, generale Francesco Olla. Pro sa cuntzessione de is terrenos est istadu netzessàriu fintzas su permissu de s’Assessoradu regionale de sa Difesa de s’ambiente.
“Su recùperu de ispàtzios pro sa pastura est unu de is efetos deretos – at sighidu a nàrrere su presidente Solinas – Si tratat de un’agiudu de importu pro 26 aziendas de su mundu de su pastoriu, in unu perìodu de crisi comente a custu, est una risposta cuncreta pro unu cumpartu de fundamentu pro s’economia isulana. Cun su Disciplinare nou chi regulamentat s’impreu de is àreas acanta s’acumprint is esercitatziones, ddoe at a àere sa possibilidade de un’integratzione mègius de is fainas militares cunforma a cussas tziviles in su territòriu, afortiende su diàlogu positivu e de collaboratzione cun s’Esèrtzitu, gràtzias a su cale sa Regione bolet otènnere àteros resurtados bonos pro sa Sardigna fintzas in àteros setores”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
