Torrare a populare is biddas prus piticas. Est sa punna de una lege aprovada in su Trentinu Alto Adige pro chircare de sarbare cussos territòrios de monte chi in su tempus arriscant de iscumpàrrere pro more de s’ispopulamentu. Unu problema chi pertocat medas biddas in Sardigna etotu ue s’intendet s’assèntzia de servìtzios comente su de is dotores e pro fàghere un’àteru esèmpiu sa dificultade in is collegamentos istradales.
In sa provìntzia de Trento ddoe at 33 Comunos chi in is ùrtimos deghe annos ant pèrdidu prus abitantes de àteros. Sa delìbera adotada dae su Giunta provintziale donat contributos chi andant dae su 35% a su 40% (chi no si depent torrare) pro agiudare chie còmporat o torrat a nou unu fàbricu comente sa domo ue bìvere pro mìnimu deghe annos opuru ddu donat a pesone a baratu a persones chi càmbiant sa residèntzia in custos Comunos.
Chie pigat su contributu non depet èssere giai residente in su territòriu ue s’agat s’edifìtziu, francu pro chie no tenet galu 45 annos de edade. Pro sa còmpora ddoe at unu contributu màssimu de 20.000 èuros mentras cun is traballos de ristruturatzione si podet arribbare finas a 80.000, su 40% de s’ispesa totale ammìtida (200.000 euros). Sa misura, como est un’esperimentu, previdet unu finantziamentu totale de 10 milliones de èuros in duos annos.
Comente naradu, su de s’ispopolamentu est unu problema meda intèndidu finas in Sardigna. Sa Regione sarda dae su 2022 at prevìdididu de ispèndere prus de 360 milliones de èuros finas a su 2025 pro is Comunos cun una populatzione prus bàscia de 3.000 abitantes.
Su finantziamentu est partzidu pro sustènnere famìlias chi giai bivint o movent in custas biddas pro cada fìgiu nàschidu, contributos pro comporare o torrare a nou sa prima domo, contributos pro abèrrere atividades noas. Un’àtera initziativa est su crèditu de imposta pro is impresas.
Capìtulu domu. Pro cada annu sa Regione Sardigna at postu a disponimentu 10 milliones de èuros prus àteros 15 milliones pro su 2025. Cunforma a su Trentinu sa modalidade est diferente: in Sardigna su contributu chi podet pigare cada persone chi faghet dimanda podet arribbare finas a 15.000 èuros, su chimbanta pro chentu de s’ispesa totale (màssimu 30.000).
Is contributos pertocant s’achistu o s’assèliu de s’abitatzione in cale sa famìlia giai tenet sa residèntzia o dd’at a tramudare. Intre is rechisitos base, ddoe est s’òbrigu de non mudare sa residèntzia pròpia dae s’abitatzione pigada, o torrada a acontzare, pro chimbe annos.
Duncas: in Trentinu donant finas a 20.000 èuros pro sa còmpora de una domo e 80.000 èuros pro dda restruturare. In Sardigna su contributu prus artu est de 15.000 èuros mancari sa Sardigna apat postu a disponimentu unu finantziamentu prus artu e pros bator annos.
Bastant custas polìticas a torrare a animare is biddas? Galu no tenìmus is datos però paret difìtzile chi unu contributu chi in Sardigna est pagu prus bàsciu de s’istipendiu mèdiu de un’annu (16.958 èuros) potzat arrennéschere a mudare sa prospetiva de vida de una persone o de una famìlia. In s’interis abetamus polìticas de traballu (ddoe at calicuna idea pro su “smart working”?), de trasportos e de su sistema sanitàriu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
