Atentzioni manna in su portu de Casteddu aundi at atracau una navi chi diat a podi portai aintru materiali de gherra indiritzau a Israele.
Sa nova, duas dis a oi, dd’at bogada a campu s’organizatzioni Bds Italia (Movimentu italianu po su Boicotàgiu, Disinvestimentu e Santzionis contra s’apartheid israeliana) chi at denuntziau sa presèntzia a intro de sa navi mercantili Msc Vega de 7 container de aciàrgiu a impreu dòpiu (dual use): “Seus chistionendi de su matessi materiali chi benit imperau po produiri proiétilis de artilleria chi benint sparaus in sa Striscia de Gaza – si ligit in una nota – Custus container faint parti de su càrrigu chi ant giai frimau e ispetzionau una pariga de dis a oi in Gioia Tauro”.
Su movimentu apustis at mandau a is Autoridadis de cumpetèntzia – Autoridadi de Sistema Portuali de su Mari de Sardìgna, Capitaneria de Portu e Ufìtziu de is Duanas de Casteddu – una “richiesta ufitziali po fai atentzioni e po no lassai partiri custu càrrigu su 26 de martzu”.
Sa dimanda, narant, pertocat is òbrigus de diritu internatzionali, de sa Cunventzioni subra de su Genocìdiu e de sa lei 185/90, “chi òbrigant s’Istadu italianu e is articulatzionis territorialis suas a no fai passai materialis chi diant a podi serbiri po cummitiri crìminis internatzionalis”.
Est intervènniu puru su sìndigu de Casteddu, Massimo Zedda: “Apustis chi eus scìpiu de sa navi Msc Vega chi diat a podi portai materiali de gherra, apu domandau a is istitutzionis cumpetentis. Is rapresentantis istitutzionalis sciant giai de s’arribu de sa navi e aiant giai apariciau is controllus. De custu mangianu funt ispetzionendi su chi nc’est in is container e is materialis portaus, comenti giai est sutzédiu in su portu de Gioia Tauro”.
“Casteddu est una citadi de paxi – at acabau su sìndigu – e tocat a nosu a abbaidai e a pediri is controllus a is autoridadis de cumpetèntzia, puru apustis de is sinnalatzionis de medas tzitadinas e tzitadinus”.
Cun sa rete Bds s’est postu finas su sindacau de sa Cgil sarda: “Gràtzias a is cuntatus e a is canalis de informatzioni de is struturas sindacalis europeas e internatzionalis – at nau su segretàriu Fausto Durante – eus scìpiu chi sa navi est in su portu de duas diis. No podeus atzetai chi de su portu de Casteddu partant materialis de custa genia, chi podint essi imperaus in logus aundi ddoe funt gherras e violatzionis de su diritu internatzionali”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
