Sighi∙nos

Salude, ite ses chirchende?

Cultura

Pellìculas in sardu, est in lìnia su bandu Kentzeboghes 2022

Est in lìnia su bandu pro partetzipare a sa de chimbe editziones de su prèmiu Kentzeboghes. At a èssere possìbile mandare is progetos pro sa realizatzione de film e documentàrios in is limbas de sa Sardigna e in is limbas minoritàrias italianas finas a su primu de mese de ladàmine 2022.

Ddoe at tempus finas a mèrcuris su primu de su mese de ladàmine pro partetzipare a su prèmiu Kentzeboghes 2022, su cuncursu pro progetos tzinematogràficos in is limbas e dialetos de sa Sardigna abertu fintzas a is limbas minoritàrias italianas.

Ammaniadu dae s’assòtziu culturale Babel, sa partetzipatzione a su cuncursu est de badas. Is progetos ant a èssere valutados dae una giuria de professionistas de su setore chi ant a assignare tres prèmios in dinari: prèmiu Kentzeboghes Sardigna, prèmiu Kentzeboghes Itàlia e prèmiu Kentzeboghes Rts (Ràdiu televisione sarda). Is progetos seletzionados posca ant a dèpere èssere trasformados in film intro de un’annu.

Sa novidade de ocannu est sa possibilidade de partetzipare a su prèmiu cun produtos audiovisivos in forma de annùntziu publitzitàriu o videoclip musicales giai cuncordados. Ma sunt medas fintzas is fainas collaterales de su prèmiu: laboratòrios iscolàsticos subra su limbàgiu tzinematogràficu pro is iscolanos de is iscolas elementares e mèdias, addòbios didàticos cun registas, seminàrios subra sa mùsica e su tzìnema in collaboratzione cun su Cunservatòriu de Mùsica de Casteddu, laboratòrios de tzìnema disponìbiles in lìnia in su giassu www.babeltv.org.

In is annos su Prèmiu Kentzeboghes s’est cunfirmadu una novidade de grandu importu in su panorama tzinematogràficu de is limbas minoritàrias, insertende•si (fintzas gràtzias a sa collaboratzione cun sa Regione Autònoma de sa Sardigna, entes pùblicos e privados) in unu percursu chi punnat a s’amparu de su patrimòniu linguìsticu de is diversas comunidades. S’Assòtziu culturale Babel traballat oramai de annos pro ammanniare e afortziareuna rete internatzionale cun organizatziones culturales e istitutziones pùblicas.

Su Prèmiu Kentzeboghes est finantziadu dae s’assessoradu regionale a sa Cultura e Istrutzione Pùblica e dae sa Fundatzione de Sardigna. Est cuncordadu in collaboratzione cun sa Sotziedade umanitària tzinèteca sarda, su Babel Film Fèstival, Areavisuale Film, Rts – Ràdiu Televisione Sarda, Terra de Punt, EjaTv, Fundatzione Sardigna Film Commission e gosat de su patrotzìniu de su Comunu de Casteddu e de sa Tzitade Metropolitana de Casteddu.

Is informatziones pro partetzipare a su cuncursu e a is laboratòrios ddas agatades a s’indiritzu https://www.babeltv.org/editzione-2022


Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22

Pro respùndere

Leave a Reply

Sa mail no at a èssere publicada

De lèghere

Cultura

Fiat su 8 de cabudanni 1981 e “Legarsi alla montagna” sa prima òpera de arte relatzionale de Itàlia. Sa fèmina chi aiat progetadu e...

Cultura

Chie apat bisitadu sa Sardigna de seguru at notadu chi s’ìsula tenet una culturagastronòmica rica e variada. Pro chie ancora no apat tentu s’ocasione...

Cultura

S’Inferru de Dante Alighieri torrat a bìvere in s’iscuriu de su padente de Seui. Sa note de mèrcuris su 10 de austu un’ispetàculu at...

Atualidade

Batorghentos e chimbe sas matas monumentales tzensidas in Sardigna dae su ministeru de sas Polìticas Agrìculas e Forestale pro more de particulare valore naturale...

Istòrias est una revista de informatzione in linia in limba sarda a règula cun s'istandard de sa Regione Sardigna. Est unu produtu de s'Asòtziu culturale Arvéschida.


|Gerèntzia | Pro ite custa revista | Riservadesa | Archìviu |


Copyright © 2022 |Registratzione in su Tribunale de Casteddu n°5 de su 14 de su mese de Trìulas 2018