Sa Torres at fatu su chi podiat. A pustis de unu campionadu cursende padros de giogu comente protagonista, s’iscuadra tataresa essit dae s’iscena cun su parègiu de eris, in su Vanni Sanna, contra a su Benevento. Sa vitòria fiat obligada, cunforma a sa derrota de su disafiu de andada, pro bi la sighire in custos play off e pro sighire a bisare una sèrie B chi galu mancat in su palmares de sos ruju-biaitos turritanos.
Sos tifosos b’ant crèidu. Sa tzitade b’at crèidu. E fintzas parte manna de una Sardigna chi – lassende·nche a banda sa naturale cuntierra chi petzi una natzionale diat pòdere reduire a provintzialismu – cheriat festare a dòpiu a pustis de sa permanèntzia in sèrie A de sos àteros ruju-biaitos de mister Ranieri.
Su campionadu fatu faeddat a craru. Su Cesena, iscuadra cun meda prus dinare e cun tempos colados in sa sèrie màssima, l’at dominadu serrende·lu cun 96 puntos (61 su diferentziale de retes intre fatas e retzidas) e lompende·nche deretu a su cadetu. Segundos sos de mister Greco, cun 21 puntos in mancu, cosa chi mustrat mègius su domìniu de sos romagnolos. Su bilantzu, est prus chi non bonu: 22 vitòrias in 38 garas e 7 ebbia sas derrotas. Su parègiu de eris non est resurtadu bastante, comente fìamus narende.
Sa Torres abarrat in sèrie C e su bisu est rimandadu. Ma Tàtari pronta fiat pro unu campionadu de livellu prus artu? Sas istruturas de giogu dèghidas sunt pro sa sèrie B? Sunt dimandas chi cherent postas e b’at rispostas chi cherent dadas pro chi su bisu non siat unu pensamentu ebbia ma una punna chi caminat in terrinu paris. De cada manera, abarrende in su campu de giogu e non in sas tribunas, s’iscuadra tenet como unu pasu de meledu e fatu-fatu unu comintzu nou de campionadu pro chi su bisu suo torret a carignare prados, carreras e coros de chi galu bi creet.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
