Unu sìmbulu turìsticu e unu situ web pro promòvere is chimbe Blue Zone (zonas blu) de su mundu. Nd’ant faeddadu in Giapone, durante s’Expo de Osaka, su guvernadore de sa Prefetura de Okinawa, Denny Tamaki, e s’assessore a su Turismu de sa Regione Sardigna, Franco Cuccureddu.
In tempus de oe medas turistas e istudios bìsitant Okinawa atraidos dae sa chirca de una vida longa. A s’addòbiu, a su cale ant leadu parte is diretores generales de su Turismu e de is atividades produtivas (pro sa Sardigna ddoe fiant sa dg Angela Porcu, Valentina Tagliagambe e sa consulente de s’assessoradu, Marzia Cilloccu) s’est fintzas faeddadu de is àteras caraterìsticas sìmiles intre Sardigna e Okinawa, de comente amparare marinas e ambiente naturale dae s’overtourism ma fintzas de comente cunservare sa lìmba e is bestidos tìpicos de ambas ìsulas chi in Okinawa impreant ancora cada die.
In prus sa delegatzione ghiada dae Cuccureddu at addobiadu su presidente de su Cussìgiu de sa Prefetura de Okinawa, Kyoky Nakagawa, su presidente de s’Unione de is 34 Càmeras de Commercio de sa Prefetura de Okinawa, Yoshiaki Komesu, e su deputadu a sa Càmera de is Rapresentantes de Tòkyo, Konosuke Kokuba.
Is “Blue Zone” sunt regiones de su mundu ue b’at una presèntzia manna de tzentenàrios. Custos logos dd’ant identificados Dan Buettner e s’iscuadra sua de chirca e includent Okinawa (Giapone), sa Sardigna, Ikaria (Grètzia), Nicoya (Costa Rica) e Loma Linda (Califòrnia). Is caraterìsticas comunas de is Blue Zone includent istiles de vida ativu, màndigu bonu, ligàmenes sotziales e una vida caraterizada dae unu forte sensu de comunidade.
Sa Sardigna est famada pro su nùmeru de tzentenàrios. Istimas inditant chi in Sardigna b’at unos 20 tzentenàrios cada 100.000 abitantes, unu de is tassos prus artos a su mundu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
