Difìtzile arregordare unu fatu comente su chi est acontessidu eris, 25 de cabudanni, in Nùgoro. A is sete de su mangianu un’òmine de chimbanta duos annos, Roberto Gleboni operàju de s’agentzia Forestas, at ochidu sa famìllia sua: sa pobidda, Giusi Massetti de 43 annos, sa fìgia Martina Gleboni de 25 annos e su fìgiu Francesco de 10 annos, unu bìghinu de domu, Paolo Sanna de 69 annos. Su bochidore at chircadu de bochire finas s’àteru fìgiu de 14 annos e sa mama Maria Esterina Riccardi: como ambos sunt bìvos. Posca Roberto Gleboni s’est ochidu issu etotu cun sa matessi arma, una pistola chi teniat a règula, impreada pro fàghere custa istrage.
Is giornales sunt chirchende de cumprèndere, cun dificultades, pro ite est sutzèdidu. Intervistadu, carchi bighinu de sa famìllia at naradu chi Roberto Gleboni fiat un’òmine chetu e semper prontu pro agiudare is àteros. Oe però su Corriere della Sera iscriet finas chi segundu àteros nche fiant problemas tra Roberto Gleboni e Giusi Massetti: paret chi s’òmine e fémina cojuados fiant separa-nde-si.
Podet èssere istadu custu su motivu, como però abarrat isceti un’ipòtesi. Difìtzile intrare in sa conca de un’òmine in pagas oras pruschetotu a pustis de unu fatu aici tràgicu.
Abarrat sa tristura pro sa morte de bator persones innotzentes. Nùgoro est in lutu, sa tzitade at cantzelladu totus is eventos prevìdidos in custas dies.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
