Sa Giunta regionale de sa Sardigna ghiada dae Alessandra Todde at aprovadu una delìbera chi destinat deghe bursas de istùdiu a giòvanos residentes in sa Striscia de Gaza. Chimbe de custas bursas ant a èssere assignadas a s’Universidade de Casteddu e sas àteras chimbe a s’Universidade de Tàtari. Cada bursa tenet unu valore de 12 milli èuros. S’obietivu est garantire su deretu a s’istùdiu a pitzocas e pitzocos chi, pro more de sa gherra de Israele in sos territòrios palestinesos, non tenent sa possibilidade de sighire sos istùdios.
Sa delìbera dd’at proposta s’assessora regionale a s’Istrutzione Ilaria Portas e faghet parte de sos “Interventos regionales pro s’Universidade”. Sos istudiantes benefitziàrios ant a èssere seberados a intro de su “Progetto umanitario educativo congiunto – Misure urgenti per il rilascio dei visti, l’istituzione di corridoi umanitari educativi e l’accoglienza integrata di studenti palestinesi bloccati a Gaza”, realizadu in paris cun s’assòtziu Gaza Students Beyond Borders.
“Gaza – narat s’assessora Portas – est bivende una pàgina de istòria e de violèntzia terrorosa. Dae in antis a sa dificultade de fàghere calicuna cosa pro custas personas amus pensadu a su benidore de custos giòvanos chi depet colare a traessu de s’agabbu de sos istùdios”.
Sa delìbera andat ultres. Su dinari a disponimentu programadu dae sa Giunta difatis est de 43 milliones e 350 milli èuros pro sos annos 2025-2027, crèschidu de ulteriores 17 milliones de èuro cada annu. Sas risursas pertocant fintzas sas ispesas de sas duas Universidades sardas pro su personale impiegadu in sas atividades didàticas: dae sos dotzentes a cuntratu a sos tutor, dae sos dirigentes didàticos a sos letores, finas a sos servìtzios de sustennu comente a segreterias istudiantes, bibliotecas, mobilidade, orientamentu e benèssere psicològicu.
“Como nos tocat abetare chi, a traessu de sos corridòios umanitàrios, sos giòvanos de Gaza potzant arribbare”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
