Sa limba sarda pro connòscere su patrimòniu archeològicu, istòricu e identitàriu de su Sàrrabus: bator addòbios in su territòriu de sos comunos de Santu ‘Idu e Biddeputzi. Custu mèrcuris su primu addòbiu.
S’Ufìtziu Linguìsticu “Sarrabesu”, organizat bator addòbios in limba sarda in su territòriu de sos comunos de Santu ‘Idu e Biddeputzi pro connòschere sas prendas istòricas e archeològicas de su Sàrrabus. Sa faina s’articulat in 4 seradas in 4 giassos identàrios de sos Comunos de Santu ‘Idu e Biddeputzi, ammaniadas segundu sa fòrmula de sa prus nòdida manifestatzione “Monumenti Aperti”, ue s’operadore linguìsticu Danilo Melis at a contare a sos visitadores s’architetura, s’istòria e sas paristòrias de cussos logos, totu in limba sarda.
Sa punna est s’isvilupu de una cussèntzia difusa subra su patrimòniu istòricu-identitàriu sardu e sa promotzione de su turismu culturale. Sas bisitas sunt abertas a sos tzitadinos sarrabesos e de sas zonas lacanàrgias, ma non s’escludet sa presèntzia de bisitadores e turistas chi bolent connòschere sa Sardigna in limba sarda.
Sa primu bisita ghiada at a èssere sa de custu mèrcuris, su 28 làmpadas, a sa tumba paleocristiana de “Su Presoni de Cirra” (Biddeputzi). Dae sas 18:30 s’operadore linguìsticu e ghia Danilo Melis de Santu ‘Idu at a chistionare de custu ipogeu misteriosu chi sa traditzione cheret siat istada su presone (de cale su nùmene) de su Casteddu de Cirra.
Su segundu apuntamentu at a èssere chenàbura su 14 de trìulas in sa Turre de Portu Coraddu (Biddeputzi). Dae sas 18:00 s’ant a abèrrere sas ghennas de sa turre costera mègius cunservada de su Sàrrabus, testimòngiu mudu de isbarcos corsaros galu imprìmidos in sos contados tramandados dae sos betzos de sa zona, ma fintzas de s’isvilupu in tempos reghentes de su turismu balneàriu e de su portu turìsticu.
Sa de tres bisitas at a èssere sa de sàbadu su 22 de trìulas a sas 18:30 a su Nuraghe Asoru (Santu ‘Idu), su giassu nuràgicu mègius cunservadu de su Sàrrabus, i su riu Picoca, ligadu a sas minas importantes de su filone sarrabesu. Asoru est unu bucone fundamentale de s’imaginàriu sarrabesu, non petzi pro s’istoritzidade sua, ma fintzas pro èssere coladòrgiu obrigadu de sa betza SS 125 Campu ‘Omu.
Ùrtimu apuntamentu sàbadu 29 de trìulas in sa Crèsia de San Lussòriu (Santu ‘Idu) in ocasione de sa famada Sagra de Sa Pratzida e de Sa Petza de Craba. Dae sas 18:00 at a èssere possìbile bisitare custa importante testimonia de s’architetura religiosa medievale. Simpre e austera, sa crèsia costituit un’unicum in totu sa Sardigna.
Chie est interessadu a partetzipare a sas bisita ghiadas in sardu podet iscrìere a s’indiritzu de posta eletrònica uls.sarrabus@gmail.com opuru podet telefonare a su 389 2654311 (Danilo Melis).
Foto Limen Sarrabus Gerrei APS
