Sos familiares de sas vìtimas de su Moby Prince ant pedidu una cummissione de inchiesta noa

Sos familiares de sas vìtimas de su Moby Prince, su traghetu chi s’est tumbadu cun sa petroliera Agip Abruzzo su 10 de su mese de abrile de su 1991, ant iscritu a sos capu-grupos de Càmera e Senadu pro pedire una commissione de inchiesta noa a trinta annos dae su disacatu, costadu 140 mortos.

“Diamus àere bòlidu regordare custu anniversàriu in presèntzia – iscrient Luchino Chessa, presidente “Associazione 10 aprile-familiari vittime Moby Prince onlus” e Nicola Rossetti, vitzepresidente “Associazione 140” – ma su virus Corona non l’at permìtidu. Tenimus su disìgiu de arribbare a custa die cun prus tzertesas e averiguare sa veridade de custu fatu, chi signat sas vidas nostras dae trinta annos”.
Segundu Chessa e Rossetti “sa sentèntzia de sa setzione Tzivile de su Tribunale de Firentze de su 2 de santandria, chi at refudadu sa rechesta contra sos Ministeros de sos Trasportos e de sa Difesa, est istada unu corfu lègiu pro sos familiares. Tenìamus fide in cussa rechesta pro apretare chie, cussa note maladita, no at fatu nudda pro pònnere in seguridade su portu de Livorno e pro dare agiudu a sas 140 persones chi sunt mortas a pustis de tribulias lègias”.

Sa protesta de sos familiares de sas vìtimas aiat tentu su sustegnu de medas senadores e deputados sensìbiles a su fatu, cun sa cunsighèntzia de carchi interrogatzione parlamentare e de carchi proposta de lege pro s’istitutzione de una cummissione noa, “pro torrare a sighire su traballu fatu dae s’inchiesta in sa legisladura pretzedente e ghiada dae su senadore Silvio Lai”.

Medas sunt sos puntos de acrarare pro un’istragu chi no at galu agatadu sos responsàbiles. “Sa Cummissione at traballadu pro duos annos – narant sos assòtzios – lompende a una relatzione finale chi at furriadu fundu a susu sas inchiestas e sos protzessos passados. Ma b’at galu meda de fàghere, bìdidos fintzas sos iscenàrios noos chi nde sunt essidos a campu”.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*