In Stersili s’agatant duos logos in su sartu, unu in Bertessu, s’àteru in Erriolus, chi is chi andant a catza mutint “Sa Posta de su Cavalleri”. Su Cavalleri fiat Craudinu Dessì (1897-1975), capu-catza e maistru de catza famadu e contadu, connotu non in bidda sua ebbia, ma finas in is àteras biddas de su tzircùitu. Non si contant is sirbones chi at mortu e nemmancu is canàrgios chi at imparadu a fàghere su catzadore. De issu mi nde aiat chistionadu sa neta, Maria Paola Olianas, medas annos a oe, cando faghia s’operadore de sa limba sarda in Sarcidanu.
Su Cavalleri, ddu mutiant aici pro ite dd’aiant numenadu “Cavaliere del Lavoro”, e aiat imparadu a andare a catza a belle totu is canàrgios de su tempus suo. Fiat unu possidente mannu, aiat bìngias, cungiados e tzeracos acordados. Fiat de famìlia chi istànt bene e sa domo sua, in bighinadu de Cucureddu, nde donat sa proa.
Fiat un’òmine traballante e is bìngias suas in su sartu de Scalepranu produsiant binos de calidade, mescamente Malvasia. Cando aiat unu pagu de tempus lìberu, a Cavalleri ddi praghiat andare a catza minuda e a catza manna. A sa data pro atzapare sirbone fiat una marrania manna, ca de sirbones nche nde aiat pagos a beru. Custu pro more ca su sartu fiat totu coltivadu e millioradu e is padentes fiant pàschidos dae is porcos a tot’annu. A is feras duncas ddis abarraiat pagu cosa de papare. Una sue de sirbone podiat angiare duos, màssimu tres copieddos a sa borta, e non 5 o 6 comente est immoe. Cando s’andaiat a catza, tando, non s’abarraiat una die ebbia comente a como, ma finas duas, si non tres dies, e non fiat nemmancu seguru ca nche dda faghiant a fàghere catza.
A s’època is cartutzas si faghiant a manu e ogni catzadore teniat totu su chi serbiat pro si cuncordare is ballas. In domo sua, difatis, sa neta de su Cavalleri at allogadu totus is ainas de su tzieddu: bòssolos, detonadores, brùvura e machineta.
Tziu Craudinu fiat portadu a nùmene peri pro is canes bonos. Su mègius Catiùscia, una catzedda de ratza sarda chi ddi catzaiat su pegus fintzas sena ddu isparare.
Pro serrare, Craudinu Dessì fiat un’òmine istimadu e tentu in cunsideru dae totus, e galu immoe is impresas suas gloriosas, a bortas crèschidas e esageradas, benint contadas a ispantu dae is catzadores giovànos chi ddas ant intèndidas dae is betzos, e su regordu suo at a abarrare pro semper in memòria comuna de sa bidda de Stersili.
